Sámediggeráđđi Silje Karine Muotka háliida elliiddearvvašvuođa gearggusvuođa nannejuvvot davvin. Dál son ávžžuha eanandoalloministara Sylvi Listhaug veahkehit nannet Šibitdoavtterinstituhta doaimmaid davvin.
– Ráđđehusa davviguovlopolitihkka ja dálkkádatrievdamat dagahit eanet dárbbu gearggusvuhtii elliiddearvvašvuođa ja biebmosihkarvuođa ektui davvin. Norggas leat ráját Supmii, Ruŧŧii ja Ruššii davvin, ja lassánana rádjajohtaleapmi buvttiha eanet hástalusaid, deattuha Muotka.
Muotka ballá ahte uhcit gelbbolašvuohta ja návccat Šibitdoavtterinstituhta ossodagas Rommas čuohcá Biebmobearráigehččui davvin, mii geavaha instituhta bálvalusaid. Son ballá ahte boađusin šaddá uhcit biebmooadjebasvuohta. Šibitdoavtterinstituhta stivra mearridii njukčamánus heaittihit Romssa ossodaga ja uhcidit doaimmaid Harstadas.
– Romssa Šibitdoavtterinstituhtta lea háhkan deaŧalaš gelbbolašvuođa boazodoalu ja árktalaš eanandoalu ektui. Erenoamážit boazodoalu ektui oaidnit dál juo ahte dálkkádatrievdamiin leat hástalusat go ođđa šaddo- ja divrešlájat bohtet. Danne lea stuorra mearkkašupmi riikkaoassái das ahte Šibitdoavtterinstituhta doaimmat nannejuvvojit.
Gulahalli
Sámediggeráđđi Silje Karine Muotka, tel. +47 984 87 576
Govva: Iselin Linstad Hauge (dyrevern) via Creative Commens Lisens Flickr:is.