Mannan vahkkoloahpa vuddjojedje togii Nordlánddabánas unnimusat 106 bohcco.
Sámediggepresideanta Aili Keskitalo lea odne hupman Jillen Njaarke orohaga boazoeaiggádiin Ole Henrik Kappfjellain, ja lea garrasit fuolastuvvan go beasai gullat makkár heahtedilis boazosápmelaččat dán orohagas leat.
– Boazosápmelaččat leat geahččalan oažžut oktavuođa Bane Norain, muhto das ii leat ávki. Lea suorggahahtti go ná sáhttá geavvat juohke jagi, vaikko ruovdemáđiifitnodat diehtá ahte bohccot leat doppe, dadjá Keskitalo.
Sámediggeráđđi lea guhká leamaš fuolastuvvan diliin Nordlánddabánas, ja lea máŋgii váldán oktavuođa Johtalusdepartemeanttain dan birra go bohccot vuddjojit Nordlánddabánas.
– Dál ferte Johtalusdepartemeanta bivdit Bane Nor beroštišgoahtit boazodoalus ja bágget sin bidjat johtui doaimmaid mat eastadit dákkár vuddjomiid, lohká Keskitalo ja fuomášuhttá ahte dát orohat lea juo giđđat massán birrasii 100 bohcco go firre bávttis vulos, ja dál geavvá ná ges. Bohccot ain vuddjojit togii.
– Dat ii leat dohkálaš. Go mii oaidnit ahte Ruoŧa beal Sámis áidot togamáđii ja ahte dat doaibmá, de ferte leat vejolaš dan bargat Norggas maiddái.
Keskitalo bivdá dál Johtalusdepartemeantta ruhtadit eastadandoaimmaid farggamusat.
– Dán áššis eat sáhte vuordit ja maŋidit doaimmaid. Dás fertejit doaimmat dakkaviđe biddjot johtui, lohká Keskitalo.
Oktavuođadieđut: Sámediggepresideanta Aili Keskitalo, +47 971 29 305