Høringsuttalelse_Troms_fylkeskommune_2013.pdf 96,88 kB
Sámediggeráđđi Silje Karine Muotkaii ii leat duhtavaš Romssa fylkkasuohkana evttohussii ahte rievdadit skuvlajagi 2014-2015 oahpahusfálaldaga. Son deattuha ahte sámi giella, kultuvra ja servodateallin leat deaŧalaččat Romssa fylkka joatkkaoahpahusa organiseremii.
- Mun vuorddán ahte fylkkasuohkan go rievdada skuvlastruktuvrra, maiddái váldá vuhtii daid váikkuhusaid maid dat buktá sámi oahpahussii ja sámi báikegottiide. Boahtteáigge skuvlafálaldagat ja skuvlastruktuvra ferte maid fuolahit dan geatnegasvuođa mii fylkkasuohkanis lea das ahte addit buori joatkkaoahpahusfálaldaga sámi servodahkii, dadjá sámediggeráđđi Silje Karine Muotka.
Muotka čujuha dasa ahte Romssa fylka maiddái ovdal lea heaittihan dakkár skuvllaid ja fágafálaldagaid, mat leat leamaš šiehtaduvvon áŋgiruššansuorgin gaskal Sámedikki ja fylkkasuohkana, nu go joatkkaskuvllat Skániin ja Vuotnasiiddas. Mannanjagi juo bivddii Sámediggi oažžut árrat dieđuid ja beassat searvat árjjalaččat jus skuvlafálaldat Romssa fylkkas vuoliduvvo dahje ođđasis organiserejuvvo. Dat ii dáhpáhuvvan. Muotka deattuha ahte dál son vuordá ahte Romssa fylkkasuohkan čuovvola ovdalis lohpádusaid áŋgiruššat sámi joatkkaskuvla- ja fágafálaldagain.
- Mun registreren maiddái ahte stuorra oasit Davvi-Romssa servodat- ja ealáhuseallimis bivdet oažžut áiggi čielggadit molssaeavttuid joatkkaskuvlafálaldahkii dain guovlluin maidda heaittihanfálaldagat čuhcet. Mu mielas dat lea buorre jurdda. Sámediggi searvá áinnas dakkár prosessii, loahpaha Muotka.
Gulahalli
Sámediggeráđđi Silje Karine Muotka, tel. +47 984 87 576