Tyfona Yolanda bilideami geažil dárbbašit sullii 15 000 bearraša iešguđet álgoálbmotjoavkkuin Luzon ja Visayas guovlluin heahteveahki. Sámediggi lea dál bivdán Olgoriikadepartemeantta merket osiid veahkis Filippiinnaid álgoálbmogii.
- Mii leat ožžon dieđuid min riikkaidgaskasaš ovttasbargoguimmiin Filippiinnain, Asian Indigenous Peoples, ahte tyfona lea čuohcan erenoamáš garrasit Luzon ja Visayas guovlluid álgoálbmotservodagaide. Ollugat leat massán sihke ruovttu ja eallinvuođu, cealká presideanta Aili Keskitalo.
Presideanta Keskitalo deattuha viidáseappot ahte lea iešvuosttaldeaddjin dat ahte sii geat uhcimusat váikkuhit dálkkádatrievdamiidda, šaddet dábálaččat gillát ovddimusat ja garrasepmosit.
- Álgoálbmogat ellet dávjá sihke lahka luonddu ja ávkkástallet luondduin, ja danne čuhcet dálkkádatrievdamat sidjiide ovddimusat. Nu dákkár luondduroassu čuohcá álgoálbmogiidda erenoamáš garrasit. Dát lea máŋgga dáfus iešvuosttaldeaddji ja čájeha man deaŧalaš dat lea ahte mii bargat dálkkádatáššiin riikkaidgaskasaččat. Mis lea maid ovddasvástádus ahte buot návccaiguin veahkehit min oappáid ja vieljaid Filippiinnain, geat dál gillájit, loahpaha presideanta Aili Keskitalo.
Gulahalli:
Presideanta Aili Keskitalo, tlf. 971 29 305.