Bivdovuoigatvuohta

Sámediggi bargá oažžumis:

• Vuoigatvuođaid guolásteapmái álbmotrievtti ja historjjálaš anu vuođul ollásit dohkkehuvvojit lágain
• Beassat mielde mearrideames guollevalljodagaid hálddašeami
• Ahte bivdovuoigatvuođaid kárten čađahuvvo maiddái olggobealde Finnmárkku

Sámediggi bargá dál dan badjelii ahte:

• Doarjja maid Sámediggi lea ovddidan láhkamearridan árvalussii guolástanvuoigatvuođaid birra ja das sihkkarastimis guolásteami sámi kultuvrra resursavuođđun čuovvoluvvo láhkaproposišuvnna ovddideami bakte Stuorradiggái, ja ahte Stuorradiggi dohkkeha guolástanvuoigatvuođa álbmotrievtti ja historjjálaš anu vuođul.
• Láhkaproposišuvnna čuovvoleamis gárvvistuvvo láhkaásahus guolástanvuoigatvuođaid birra.

Bargamis finnmárkolágain ledje konkrehta guolástusmearrádusat dehálaš fáttát go Sámediggi ráđđádalai Justiisalávdegottiin. Finnmárkolága meannudeami boađus lei ahte Stuoradiggi mearridii ahte:

”Stuorradiggi bivdá Ráđđehusa farggamusat čielggadit sápmelaččaid ja earáid guolástanvuoigatvuođaid ábis olggobealde Finnmárkku, dás maiddái unnimus eari vuolil logi mehter guhkkosaš fatnasiidda, ja ovddidit čuovvoleaddji ášši dán birra Stuorradiggái.”

Evttoh.O. nr.80 (2004-2005) eanetlogu mearkkašumis daddjui ahte ”gažaldagat mat gusket sámi guovlluin mearraguolásteami vuoigatvuođaide ja hálddašeapmái lea viidát ja máŋgga geardde čielggaduvvon, earenoamážiid 1990-2001 áigodagas”. Eanetlohku celkkii viidáset ahte ”eanetlogu oaivila mielde ii [sáhte] hilgut ahte leat gávdnojit láidesteamit sihke álbmotrievttis ja Norgga rievttis ahte earenoamážiid vuhtiiváldit guolásteami mearrasámi guovlluin guolástanhálddašeami hábmema ja  doaimmaheami oktavuođas. Dálá dili ektui ii leat čielggaduvvon movt dát beroštumit beaktileamos vuogi mielde galget vuhtiiváldojuvvot doaibmi guolástushálddašeamis”.

Ráđđehus bivdii Guolástus- ja riddodepartemeanta fuolahit ahte Stuorradikki ávžžuhusmearrádus čuovvoluvvo. Maŋŋil go lei ráđđádallan Sámedikkiin nammadii Guolástus- ja riddodepartemeanta áššedovdilávdegotti – Riddolávdegotti – mii prinsihpalaš vuođu mielde galgá čielggadit sápmelaččaid ja earáid guolástanvuoigatvuođaid ábis olggobealde Finnmárkku. Riddoguolástanlávdegoddi ovddidii čielggadusastis, NAČ 2008: 5 Guolástanvuoigatvuohta ábis olggobealde Finnmárkku.

Les mer om Kystfiskeutvalgets innstilling her.