Boahtteáiggi areála- ja biraspolitihkka Sámis

Sámi kultuvra ja ealáhusbargu lea deddojuvvon. Luondduresurssaide bahkken lassána dađistaga nugo minerálaid, čáhce- ja bieggafámu, ja seammás unnu áddejupmi árbevirolaš sámi eallinvuohkái ja luondduresurssaiguin ávkkástallamii.

Čielga jietna
-Sámedikkis ferte leat čielga jietna areála- ja biraspolitihkas. Danne lea dárbu geahčadit ja árvvoštallat politihkkasuorggi, ja hábmet čielga mihttomeriid ja rámmaid Sámedikki politihkkii jagiin ovddas gulvui, dadjá sámediggeráđđi Thomas Åhren.

Åhren dadjá ahte Sámediggi ferte leat deaŧalaš eavttuidbiddji, váldedoaimmaheaddji ja konsultašuvdnaoasálaš dain áššiin mat gusket areála ja biraslaš hástalusaide mat leat sámi servodaga ovddabealde oanehis ja guhkes áiggi badjel

-Mii galgat searvat mearrádusaide movt min árbevirolaš guovlluid galgá hálddašit boahtteáiggis, danne go dás lea sáhka min boahtteáiggis, dadjá sámediggeráđđi Thomas Åhren.

 Bovde viiddis mieldeváikkuheapmái

Sámediggeráđi čilgehus areálaid ja birrasa birra ovddiduvvo dievasčoahkkimii juovlamánus, ja lea oassi ođđa areála- ja birasdieđáhusa ráhkadanbarggus, dát dieđáhus galgá bidjat bajimuš ja guhkes áiggi vuoruhemiid Sámedikki politihkkii areála- ja birasáššiin.

-Sámediggeráđđi háliida bovdet sihke báikegottiid, organisašuvnnaid, dutkanbirrasiid, gielddaid ja stáhta eiseválddiid ságastallat hástalusaid ja čovdosiid birra mat leat areála- ja biraspolitihkas, dadjá Åhren.
Resursajoavku ja fágaseminára
-Mii leat bidjan resursajoavkku mii galgá geahčadit movt meahcceresurssaid dáláš hálddašeapmi lea heivehuvvon meahcásteddjiid dárbbuide, dadjá Åhren.

http://www.sametinget.no/Miljoe-areal-og-kulturvern/Areal/Etablerer-ressursgruppe-for-utmark

Oassin dán barggus lea sámediggeráđđi bovden maiddái iešguđege dutkiid ja máhttobirrasiid čállit artihkkaliid sierra fáttáid birra. Resursajoavkku ja dutkiid máhttovuođđu galgá doaibmat duogážin ja vuolggasadjin gulahallančoahkkimiidda Sámedikki ja sámi báikegottiid ja organisašuvnnaid gaskka.

Sámediggi doallá fágaseminára Romssas skábmamánu 25. ja 26. beivviid gos dutkit ovdan buktet iežaset artihkkaliid.

http://www.sametinget.no/Kalender/Fremtidig-areal-og-miljoepolitikk-i-Sapmi-fagseminar

Sámediggeráđđi háliida rávvagiid/árvalusaid fáttáide maid berrešii guorahallat dieđáhusas. Buohkat sáhttet addit rávvagiid ja buktit árvalusaid.

Árvalusaid sáhttá sáddet: biras@samediggi.no

Áigumuššan lea ahte dieđáhus ovddiduvvo Sámediggái meannudeapmái 2016:s.

Eanet dieđuid addá: Sámediggeráđđi Thomas Åhren, 908 39 663   

Čilgehus gávdno dás:
 
http://innsyn.e-kommune.no/innsyn_sametinget_norsk/wfdocument.ashx?journalpostid=2015028983&dokid=613336&versjon=1&variant=P&
 
Loga eanet:
 
http://www.sametinget.no/Miljoe-areal-og-kulturvern/Areal/Sametingsmelding-om-areal-og-miljoepolitikk-Invitasjon-til-innspill