Eanandoallo- ja biebmodepartemeanta ii doahttal Sámedikki ja Norgga boazosápmelaččaid Riikasearvvi (NBR) ákkaid dan vuostá ahte heaittihit boazodoallohálddahusa guovllustivrraid ja ahte Fylkkamanni váldá badjelasas hálddahuskantuvrraid.
- Dan badjelgeahččama maid Sámediggi ja NBR dál vásihit, oainnán mun hui duođalažžan. Rievdadeamit dáhpáhuvvet Sámedikki miela vuostá, dadjá sámediggeráđi miellahttu Ellinor Jåma.
Dieđitkeahttá Eanandoallo- ja biebmodepartemeanta dieđihii ođđasiin cuoŋománu 2011 movt boazodoallohálddahus galgá rievdaduvvot. Konsultašuvnnat organiserenrievdadeami birra álge easkka njukčamánu 2012 maŋŋel go departemeanta mieđihii álgit ráđđádallat molssolaš čovdosiid.
- Sámediggi ja NBR leaba ovddidan vuđolaččat jurddašuvvon gaskaneassohppojuvvon evttohusaid, muhto departemeanta ii leat čájehan soahpandáhtu. Mu oainnu mielde sáhttá eahpidit ahte leago departemeanta konsulteren iežas buoremus dáhtu mielde ja dainna ulbmiliin ahte olihit ovttaoaivilvuođa nu go sii leat geatnegahtton, dadjá Ellinor Jåma.
Boazodoallu lea dat áidna kulturvuđot sámi ealáhus, ja lea vuođđoealáhus sámi kultuvrras. Badjel 20 jagi lea Stuoradiggi máŋgga dilis dovddahan ahte sámiid politihkalaš mihttomearri lea sirdit eanemus lági mielde mearridanválddi áššiin mat earenoamážit gusket sámi servodaga sámi álbmogii. Stáhta lea maid álbmotrievttálaččat geatnegáhtton sihkarastit ahte sámit besset ieža hálddašit ja mearridit iežaset ealáhusain.
- Departemeanta vállje hábmet dakkár boazodoallohálddahusa mii rihkku gustovaš sámepolitihka ja álbmotrievttálaš geatnegasvuođaid. Mii oažžut dakkár boazodoallohálddahusa mas ii leat legitimitehta. Boađusindas lea earret eará dat ahte Sámediggi ferte geassit ruovttoluotta iežas nammaduvvon áirasiid Boazodoallostivrras. Hálddahus legitimitehta haga lea eahpebevttolašhálddahus. Dát rievdadus rihkku áigumuša, dadjá Ellinor Jåma.
Eanandoallo- ja biebmodepartemeantta árvalus rievdadit boazodoallolága go guoská guovllustivrra heaittiheapmái, ja maiddai bidjat boazodoallohálddahusa Fylkkamánni vuollái, galgá meannuduvvot Sámedikki dievasčoahkkimis ovdalgo láhkaárvalus biddjo Stuoradikki ovdii.
Oktavuođaolmmoš:
Ráđđelahttu Ellinor Marita Jåma, tlf. 916 13 460.