Ráđđelahttu Ellinor Marita Jåma bivdá ahte Boazodoallostivra ii meannuut boazologu unnideami, ovdal go lea gulasskuddan boažodoaluin.
Boazodoallostivra galggai duorastaga guovvamánu 7.b. meannudit siiddaid boazologu unnideami. Siiddat leat ožžon vejolašvuođa buktit cealkámušaid unnidanevttohussii, muhto singuin eai leat leamaš konsultašuvnnat mearrádusaid hárrái.
-Mun bivddán ahte Boazodoallostivra ii mearrit siiddaid boazologu unnideami dál. Dakkár mearrádusain sáhttá boazodoallostivra rihkkut stáhta mearriduvvon konsultašuvdnabargovugiid ja álbmotrievttálaš geatnegasvuođaid konsultašuvnnaid birra. Dat sáhttá šaddat hui duođalaš ášši, dadjá sámediggeráđđi Ellinor Jåma.
Sámediggi ii leat Eanandoallo- ja biebmodepartemeanttas ožžon diehtit boazologu unnideami mearridanproseassa stáhtusa.
-Eanandoallo- ja biebmodepartemeanta ii leat addán Sámediggái dieđuid boazologu unnidanbarggus. Mun vuorddán ollislaš čilgehusa barggu stáhtusa birra departemeanttas, ja mot áigot ovddasguvlui bargat. Sámediggi ii sáhte dohkkehit ahte Boazodoallostivra mearrida boazologu unnideami ovdal go mii leat ožžon namuhuvvon čilgehusa ja ovdal go sáhttit leat sihkkarat ahte mearrádus ii hilggo lágaid ja vuoigatvuođaid, loahpaha Ellinor Jåma.
Eanet dieđut: Ráđđelahttu Ellinor Marita Jåma, + 47 916 13 460