Sámediggeráđđi Thomas Åhren oaivvilda ahte lea áigi álggahit doaibmabijuid movt hehttet bohccuid vuddjomis Norlándda ruovdemáđijas.
-Mun lean fuolas go oainnán man ollu bohccot vuddjojit dihto riskasajiin Norlándda ruovdemáđija alde, dadjá Åhren. Dieđihuvvo ahte eallit gillájit hui sakka go veallájit ruovdemáđija luhtte guhkes áiggi ovdal go dat heakkahuhttojuvvojit, ja boazodollui dat buktá stuorra psyhkalaš gillámušaid ja ekonomalaš vahágiid.
-Hástalusat hehttet bohccuid vuddjomis ii leat ođđa áššečuolbma ja buohkaide lea ávki jos ruovdamáđija sihkkarastojuvvo elliid várás, dadjá Sámediggeráđđi Thomas Åhren.
Danne lea Sámediggeráđđi bivdán čoahkkima Johtalusdepartemeanttain guorahallat plánejuvvon sihkkarastindoaibmabijuid čuovvoleami.
–Mun vuorddán ahte departemeanta hoahpuha doaibmabijuid realiserema maiguin hehttet dáid roasuid mat leat juohke jagi, dadjá Åhren loahpas.
Gulahalli:
Ráđđelahttu Thomas Åhren, tel. 908 39 663
