Rekrutteringsbrev_Norsk versjon.pdf 858,57 kB
Sámediggi álggaha fitnodatovddideami kulturealáhusa várás lullisámi guovllus. Sámediggeráđđi Silje Karine Muotka sávvá ollu hutkás ealáhushutkiid searvat prográmmii mii álggahuvvo guovvamánus.
fitnodatovddidanprográmma Dáhttu lea lágiduvvon Finnmárkkus ja Romssa fylkkas 2014 rájes, prográmma mii lea erenoamážit sámi kulturealáhusa várás. Dál lea lullisámi guovllu vuorru, ja Sámediggeráđđi sávvá ollugiid searvat prográmmii 2016:s.
Finnmárkku fitnodat Kreativ Industri lea ovddidan ja jođiha prográmma Sámedikki ovddas.
-Mii lea vásihan ahte Dáhttu lea lihkostuvvan fitnodatovddidemiin erenoamážit sámi kulturealáhusaid várás. Sámediggái lea deaŧalaš áŋgiruššat min ođđa ealáhusaid ovddidemiin Sámis. Mii illudit erenoamážit dál go lea lullisámi guovllu vuorru. Mii diehtit ahte dáppe leat ollu hutkás ealáhushutkit earret eará dakkár surggiin go design, duodji, musihkka ja mátkeealáhusat, dadjá Sámediggeráđđi Silje Karine Muotka.
Vuosttaš čoahkkaneapmi Snoasas
Prográmma álggahuvvo Samien Sijtes Snoasas guovvamánus 2016 ja bistá jagi. Prográmmas leat 3 fágačoahkkaneami masa 12 oassálasti besset searvat. Juohke oassálastifitnodat beassá dasa lassin geavahit eanemusat 50 ráđđeaddidiimmu maid sámi kulturealáhusaid hárjánan fitnodatráđđeaddit fállet.
Buohkat geat doaimmahit sámi dáidaga, kultuvrra ja mátkeealáhusa lullisámi guovllus Nordlándda lulit guovlluid rájes Lulli-Trøndelága rádjai ávžžuhuvvojit dáhttut Kreativ Industri addit eanet dieđuid prográmma birra.
Dieđihanáigemearri lea guovvamánu 1. b. 2016. post@kreativindustri.no
Heivehuvvon sámi kulturealáhusaide Sámediggi lea čađahan siskkáldasevaluerema Dáhttu prográmmas Finnmárkkus mii čađahuvvui áigodagas 2014 - 2015.
-Evalueren čájeha ahte prográmma orru doaibmamin hui bures fitnodatovddideaddjin kulturealáhusas. Kulturealáhusa jurddašeapmi lea máŋggasuorggat ja danne eai heive dábálaš ovddidanprográmmat buohkaide, dadjá Muotka. Dát prográmma lea erenoamážit heivehuvvon kulturealáhusa dárbbuide ja stuorrunvejolašvuođaide.
-Dáhttu evalueremis deattuhuvvojit erenoamážit fierpmádat- ja ovttasbargogaskavuođat mat čuožžilit prográmma fitnodagaid gaskkas. Dasa lassin orrot dat fitnodagat mat leat oassálastán, áŋgiruššat eanet ulbmillaččat ja konkrehta iežaset ealáhusain maŋŋá prográmma čađaheami, dadjá sámediggeráđđi Silje Karine Muotka.
Prográmmii leat ollugat searvan go dat čađahuvvui Romssa fylkkas ja Finnmárkkus, dán rádjai leat 36 kulturealáhusdoaimmaheaddji oassálastán.
Eanet dieđuid addá:
Sámediggeráđđi Silje Karine Muotka 984 87 576
Kreativ Industri tel 488 8216
Rekrutteringsbrev_Norsk versjon.pdf 858,57 kB
