Sámediggeráđđi galgá galledit iešguđet guovlluid báikkálaš servodagaid oažžun dihte cealkámušaid Sámedikki politihkkii areála ja birassuorggis. –mii áigut bivdit sámi servviid, ealáhusdoaimmaheddjiid ja fágaolbmuid lagasbirrasis searvat bargui hábmet min politihka dán suorggis, lohká sámediggeráđđi Thomas Åhrén.
Ráđi mátkkoštallan álgá Rørosas juo guovvamánu 4.beaivvi. de jotket mátkkoštemiin Guovdageidnui guovvamánu 10.beaivvi, viidáset Evenáššái guovvamánu 11.beaivvi ja loahpahit mátkkoštallama Vuonnabađas guovvamánu 15.beaivvi.
Evenáššis galgá sámediggeráđđi maid deaivvadit suohkaniiguin, erenoamážit digaštallat ja oažžut oainnuid dasa ahte movt váldit vára sámi beroštumiin suohkanplánemiin.
Buohkat bovdejuvvojit
-Mii leat bovden servviid, ealáhusdoaimmaheddjiid ja fágaolbmuid lagasbirrasis searvat, lohká sámediggeráđđi Thomas Åhrén.
Son illuda oažžut oainnuid dáidda iešguđet áŋgiruššansurggiide boahtte dieđáhusas: hálddašeami ja geavaheami birra mearas ja eanaareálain, suodjalanguovlluid birra, luondduresurssaid ávkkástallama birra, meahcásteami ja árbevirolaš máhtu birra. Oainnut mat bohtet čoahkkimiin galget leat dehálaš oassin dieđáhusa máhttovuođus.
-Sierra oassin čoahkkinplánain biddjo áigi digaštallat áigeguovdilis áššiid iešguđet sámi báikkálaš servodagain maid mii galledit, lohká Åhren. Čoahkkimiidda leat bovdejuvvon báikkálaš logaldallit geat galget váikkuhit bidjat fokusa báikkálaš areála- ja birasáššiide gos leat sámi beroštumit.
Sámedikki areála ja birasdieđáhus galgá plána mielde meannuduvvot Sámedikki dievasčoahkkimis geassemánu 2016.
Báikkit maid ráđđi galleda:
Røros: Guovvamánu 4.b. dii. 18 til 20. Røros Joatkaskuvllas, borahagas
Guovdageainnus: Guovvamánu 10.b. dii. 18 til 20. Sámi Állaskuvllas, Sáhkaskáiddis
Evenáššis: Guovvamánu 11.b. dii. 18.30 til 20.30. Várdobáikkis
Vuotnabađas, Unjárggas: Guovvamánu 15.b. dii. 18 til 20. Sámedikkis kántuvrras nuppi dásis Vuotnabađas
Váldde oktavuođa: Sámediggeráđđi Thomas Åhren, 908 39 663
Loga eanet:
http://www.sametinget.no/Miljoe-areal-og-kulturvern/Areal/AApningsinnlegg-areal-og-miljoekonferanse
http://www.sametinget.no/Miljoe-areal-og-kulturvern/Areal/Fremtidig-areal-og-miljoepolitikk-i-Sapmi