NORSK_Plakat_Manifest_mot_mobbing.pdf 60,10 kB
Vuosttal givssideami, ja vuoitte 10 000 ruvnnu! Sámediggi addá 10 000 ruvnnu dan skuvlii dahje skuvlaluohkkái, mii ráhkada buoremus plakáhta givssideami vuostá. Plakáhta ferte sáddejuvvot midjiide maŋimustá golggotmánu 24. b. Plakáhta galgá geavahuvvot Sámedikki barggus givssideami vuostá.
-Sámediggi lea searvan nationála givssidaneastadanmanifestii ja searvá nuppi gearddi dán jagi. Dán jagi háliidit mii hástalit sámi mánáid ja nuoraid váikkuhit kampánjii. Givssideami biehttaleapmi ferte leat oassi mis, oassi das geat mii leat, deattuha Sámediggeráđi lahttu Silje Karine Muotka.
Son oaivvilda ahte ii leat doarvái bargat dušše kampánjjaiguin ja prošeavttaiguin givssideami eastadeami ja vealaheami ektui. Muotka deattuha ahte givssidaneastadanbargu ferte oidnot árgabeaivvis skuvllain ja astoáiggearenain. Danne háliida son áŋggirdahttit mánáid ja nuoraid dán jagi kampánjjas. 10.000 ruvdnosaš vuoitu manná dan skuvlaluohkkái mii ovdal golggotmánu 24. b. ráhkada buoremusat giktaleaddji plakáhtta.
-Vuoitoplakáhtta geavahuvvo Sámedikki givssidaneastadanbarggus nationála dásis ja báikkálaččat. Dán jagi nugo ovddit jagiin ge searvat mii nationála kampánjii givssidaneastadanmanifestii, ja mii háliidit ahte skuvllat gos leat sámi oahppit, čađahit sierra doaimmaid. Vuoitoplakáhtta šaddá deaŧalaš márkanfievrridanoassi dan oktavuođas, deattuha Muotka.
-Mii ávžžuhit skuvlaluohkáid searvat dán bargui. Givssidaneastadanbargu lea deaŧalaš bargu, ja dát lea hui buorre vuohki movt skuvlaluohkáid oažžut váldit ovdan dán fáttá. Mii fertet eastadit givssideami beaivválaččat, dadjá Ánná Káisá Partapuoli, gii lea Sámedikki nuoraidpolitihkalaš lávdegotti jođiheaddji.
Givssidaneastanmanifeasta lea nationála áŋgiruššan givssideami eastadeamis áigodagas 2011-2014. Kampánja lea Ráđđehusa, Gielddaid guovddášlihtu, Oahpahuslihtu, Skuvllaid riikkasearvvi, Vuođđoskuvlla vánhenlávdegotti ja Mánáidgárddiid vánhenlávdegotti gaskasaš ovttasbargu, ja buohkat dáin leat vuolláičállán manifeastta. Sii leat geatnegahttojuvvon bargat buori ja searvvaheaddji bajásšaddan- ja oahppanbirrasa ektui nu ahte ii álggage dohkkehit givssideami.
Gulahallit:
Inger Anne Pulk. Tlf: 78 48 42 07
Anne Jannok Eira. Tlf: 78 47 40 48