Sámedikki álgaga vuođul álggaha Finnmárkku Dearvvašvuohta prošeavtta mii galgá buoridit dulkoma dearvvašvuođasuorggis. – Dát lea stuorra lávki rievttes guvlui, cealká ráđđelahttu Ellinor Marita Jåma.
Doppe gos ovdal lei dábálaš geavahit sámegiel dulkka skájanasaid bokte, de geavahuvvo dál videogaskkusteapmi. Dieinna vugiin ii geavat dulka dušše celkojuvvon sáni, muhto maiddái rumašgiela, mimihka ja muohtogeahčastagaid.
- Čielga buoremus dulkondilli lea álo go buohcci ja dulka leaba seamma lanjas. Go dat ii leat vejolaš ovdamearkka dihtii guhkes gaskka geažil, de lea videogaskkusteapmi hui buorre čoavddus. Videogaskkusteapmi askedihtoris álkida maiddái dulkka geavaheami eará diliin go dušše doavtterháleštallamiin go lea sisalágiduvvon, dadjá ráđđelahttu Ellinor Marita Jåma.
Son deattuha viidáseappot man deaŧalaš dat lea ahte beassat geavahit iežas eatnigiela go deaivvada dearvvašvuođabálvalusain.
- Duohtavuohta lea ahte olmmoš máhccá iežas eatnigillii hušaid siste ja go lea vuorjašuvvan. Go iežas giela hállá, de lea álkit geavahit rivttes ja dárkilis sániid. Boasttugulahallan medisiinnalaš oktavuođas sáhttá leat heaggaváralaš ja mus lea buorre jáhkku dasa ahte Finnmárkku Dearvvašvuođa ovddasmanniprošeakta sáhttá buoridit buohcci ja divššára gaskasaš gulahallama, cealká ráđđelahttu Ellinor Marita Jåma.
Ovddasmanniprošeakta bistá golggotmánu 1. b. rájes juovlamánu 9. b. 2012 rádjai. Hámmárfeastta buohcciviesus lea dulka 100 proseantta virggis beaivet, ja ovddasmanniprošeavttas lea dulka olámuttus dii. 16-24 buot árgabeivviid ja dii. 08-24 vahkkoloahpaid.
Tulkkat galget leat olámuttus videokonferánsii 30 minuhtas dan rájes go dearvvašvuođabargit váldet oktavuođa.
Gulahalli:
Ráđđelahttu Ellinor Marita Jåma, tel. 916 13 460