Sámedikki bušeahtta 2015 dohkkehuvvui dievasčoahkkimis juovlamánu 15. b. Ráđđelahttu Ann-Mari Thomassen lea duhtavaš go Sámediggi lea dohkkehan dakkár bušeahta mii boahtá sámi servodahkii buorrin boahtteáigái.
- Sámediggi áigu 2015:s vuoruhit sámi mánáid oahpponeavvuid ja min oktasaš kulturárbbi dainna lágiin ahte láhčit viidáseappot ovddideami sámi museaide, cealká ráđđelahttu Thomassen.
Jagi 2015 bušeahtas lea ohcanvuđot juolludus sámi oahpponeavvuid ráhkadeapmái 21 025 000 ru, mii lea 3 400 000 ruvdnosaš lassáneapmi 2014 rájes.
- Mánáid oahpponeavvuid vuoruhemiin mii háliidit váikkuhit dasa ahte eanet sámi mánát besset geavahit sámi skuvlagirjjiid. Dát lea hui deaŧalaš giela boahtteáigái, ja mánáid ovdáneapmái, dadje ráđđelahttu Ann-Mari Thomassen.
Maiddái juolludeapmi sámi museaide lea lassánan, 27 752 000 ruvnnus 2014:s 31 970 000 ruvdnui 2015:s. Dát lea 4 218 000 ruvdnosaš lassáneapmi.
Ráđđelahttu Thomassen čujuha dasa ahte sámi museat lea báhcán ekonomalaš ovdáneamis dáža museaid ektui ja ahte dát juolludeapmi lea mielde njulgemin dán bonjuvuođa, ja dahkamin sámi kulturárbbi olahahttin.
- Oktasaš sámi kulturárbi lea rikkis, muhto das lea hui ollu mii lea čihkkojuvvon vuorkkáide ja gealláriidda. Mii áigut vuoruhit sámi museaid dannego lea mearehis deaŧalaš ahte min kulturártnat ožžot dan saji maid dat ánssášit ja šaddet buohkaide olámuddui. Kulturárbbi bokte mii duddjot Sámi boahtteáigái.
Jagi 2015 bušeahta rámma váikkuhangaskaomiide, bistevaš ja ohcanvuđot, lea oktiibuot 270 722 000 ru. Dat lea 1 897 000 ru lassáneapmi 2014 rájes.
Gulahalli:
Ráđđelahttu Ann-Mari Thomassen, tel. 900 57 123