Sámediggeráđđi lea guhkes áiggi leamaš fuolas dan geažil go politiijain váilu giella- ja kulturgelbbolašvuohta, mii sáhttá čuohcat sámiid riektesihkarvuhtii. Áššečuolbma lea dál váldojuvvon ovdan Justiija- ja gearggusvuođadepartemeanttain.
- Vaikko vel gávdnošedjege gelbbolaš olbmot geain lea sámi giella- ja kulturgelbbolašvuohta, de lea leamaš hástalussan oažžut sin virgáduvvot sámi guovlluide. Earret earán dan geažil go lea leamaš eahpečielggas movt sin sáhttá vuoruhit virgáibidjanproseassain, čilge Sámedikki presideanta Egil Olli.
Olli dadjá dasto ahte Sámediggeráđđi lea háliidan ahte jođáneamos lági mielde boađášedje sadjái njuolggadusat das mainna lágiin vuoruhit dohkálaš sámegielat olbmuid ja olbmuid geain lea kulturgelbbolašvuohta virggiide sámi guovlluin.
Justiisa- ja gearggusvuođadepartemeanta lea dál ráhkadan čilgehusa mas dadjet ahte vejolaš lea sihke deattuhit, ja maiddái gáibidit gelbbolašvuođa sámi gielas ja kultuvrras sámi guovlluin dárboiskkadeami mielde.
- Mu illudahttá hui sakka dat go Justiisa- ja gearggusvuođadepartemeanta lea guorahallan áššečuolmma duođas ja oaivvilda ahte gelbbolašvuohta sámi gielas ja kultuvrras sáhttá sihke deattuhuvvot ja gáibiduvvot sámi guovlluin, cealká presideanta Egil Olli.
Máhttu servodagaid birra gos politiijat barget lea hui deaŧalaš diliid dulkomis, báikegottiide sajáiduvvamis ja vai oažžu rivttes dieđuid.
- Nu leage sámiid riektesihkarvuođa doalaheami dihte deaŧalaš ahte politiijain sámi guovlluin lea gelbbolašvuohta sámi gielas ja kultuvrras, dadjá presideanta Egil Olli loahpas.
Gulahallanolmmoš:
Sámedikki presideanta Egil Olli, tel. 900 26 880