Oahppoministtar Kristin Halvorsen ja Sámedikki várrepresideanta Laila Susanne Vars deaivvadeigga vuosárgga njukčamánu 18. b. digaštallat mo galgá čuovvolit Butenschøn-lávdegotti čielggadeami sámi alitoahpu ja dutkama birra.
-Lean hui duhtavaš go Ráđđehus dán čuovvola Butenschøn-lávdegotti evttohusa, ja árvvoštallá mo mii ovttas sáhttit nannet rekrutterema sámi alitohppui ja dutkamii. Čoahkkin lei ávkkálaš, dadjá várrepresideanta Laila Susanne Vars.
Sámediggi válddii ovdan máŋga prinsihpalaš ášši stáhtaráđiin, earret eará Sámi allaskuvlla ovdáneami allaskuvllas dieđalaš allaskuvlan ja álgoálbmotuniversitehtan, akkrediterennjuolggadusa kvantitatiiva gáibádusa heiveheami ja dárbbu rekrutteret eanet sámi studeanttaid alitohppui. Máŋga stuorra doaibmabiju digaštallojuvvojedje ja mo iešguđet proseassaiguin bargat viidáseappot.
- Háliidan deattuhit dan politihkalaš ovttamielalašvuođa ahte áŋgiruššat sámi alitoahpuin, erenoamážit sámegielas. Fáddán lei maid stipeandadárbu master- ja doavttergrádaohppui sámegiela. Dan galgá stáhtaráđđi čuovvolit viidáseappot ráđđehusas.
- Mii digaštalaimet maiddái ovttasordnenráđi sámi alitoahpu várás ja juvssaimet ovttamielalašvuođa das ahte dasa lea stuorra dárbu. Sámediggi ja departemeanta galget dál fargga ovttasráđiid čuovvolit organiserema ja ásaheami. Politihkalaččat lei ovttamielalašvuohta das ahte organiseren galgá árvvoštallojuvvot UHR vuogádagas, sihkkarastin dihtii ahte sámi perspektiiva váldojuvvo mielde UHR-suorgái, nu ahte dat ii šatta dakkár mii báhcá go čađahuvvo nationála áŋgiruššan, dadjá Laila Susanne Vars.
Viidáseappot digaštallojuvvui Sámedikki viđa jagi rekrutteren- ja gealbudanprográmma sámegielas ja sámi alitoahpus, ja dárbu ásahit fierpmádaga sámi dutkama várás. Bealit galget čuovvolit dáid čuoggáid.
- Ovddasvástideaddjin sámi alitoahpus ja dutkamis Sámedikkis lea duhtavaš čoahkkimiin ja dainna ahte Butenschøn-lávdegotti evttohus dál čuovvoluvvo, dadjá várrepresideanta Laila Susanne Vars.
Gulahalli:
Várrepresideanta Laila Susanne Vars, tel. 977 54 102