Konferánsa guovddáš sámi guovlluin, guovddáš sámi fáttáid birra ja dasa lassin sámi álbmotbeaivvi – guovvamánu 6. Beaivvi. Kirkenenskonferansen lea dákkár konferánsa, muhto sámi jienat gal eai leat váldon fárrui. Dása Sámedikke ráđđeláhttu Marianne Balto reagere garrasit.
- Kirkeneskonferansen lea dađi mielde šaddagoahtán guovddáš konferánsa davviguovlopolitihka hábmema hárrái. Konferánssas daddjojit stuorra sánit ja doppe lea muđui sáhka váldočuoggáin das mo davviguovllut, guovddáš álgoálbmotguovllut, galget ovdánit čuovvovaš logijagiid. Jus geahčestat konferánssa prográmma de orru dego ahte álgoálbmogat eai oba leatge gullevaččat davviguovlluide, ja ahte eat eisege galgga leat mielde dan ovdáneamis mii dál dáhpáhuvvá min guovlluin. Mun gal lean beahtahallan lágiideddjiide, Barentssekretariáhttii, Mátta-Várjjat gildii ja erenoamážit Olgoriihkadepartementtii, dadjá ráđđeláhttu Marianne Balto.
Álgoálbmogiidda čájehuvvo feaskkir
Sámedikki ráđđeláhttu Marianne Balto lohká iežas fuolastuvvan dainna vieruin mii dál orru sajáiduvvame, go lágiduvvojit ekslusiiva seminárat ja konferánssat gaskkal stuorra industriija berošteddjiid ja guovddáš politihkkariid, almma ahte bealit geaidda dákkár áššit dávjá gusket – dán oktavuođas sámit, besset leat fárus logaldallin dahje juobe guossin ge.
- Mun reageren go Girkonjárggakonferánssas jagis jahkái leat leamaš duođalaš fáttát ságastallamiidda, fáttát mat njuolgut gusket sámiid beroštusaide, nugo ealáhusáššit, gelbbolašvuođaovdáneapmi ja das mo dahkat báikegottiid geasuheddjiin olbmuide. Juohke jagi lea álgoálbmogiidda čájehuvvon feaskkir dan seammás go earáide addo vejolašvuohta hábmet ihttábeaivve davviguovlopolitihka. Mu mielas lea dát unohis badjelgeahččan. Erenoamážit hirpmástuhtte Olgoriikkadepartemeantta mu, gos muđui leat leamaš rahpasat ja čorgadat álgoálbmotgažaldagaid hárrái. Dá go lea vuohki mo ovttasráđiid gávdnat čovdosiid čuolmmaide, jearrá ráđđeláhttu Marianne Balto.
Dán jagáš Girkonjárggakonferánssas leat vihtta váldofáttá; politihkalaš ovdáneapmi davviguovlluin, industriijaovdáneapmi, logistihkkaovdáneapmi, davviguovllut 2030 guvlui ja servodathuksen davvin. Konferánsa álggahuvvo guovvamánu 5. beaivvi ja loahpahuvvu guovvamánu 6. beaivvi – sámi álbmotbeaivvi.
Gulahallanolmmoš:
Sámedikki ráđđeláhttu Marianne Balto, tlf. 480 63 358.