Sámi parlamentáralaš ráđđi (SPR) nanne ja beavttálmahttá davviriikkalaš sámi giellaovttasbarggu. Čakčamánu álggus álggahuvvo prošeakta, man mihttun lea oažžut bistevažžan Davviriikkalaš sámegiela fága- ja resursaguovddáža.
SPR bijai 2007:s johtui Sámi giellaovttasbarggu ođđasit organiserema. Stuorámus hástalussan lea leamaš gávdnat čovdosiid dasa, mo sierra giellaorgánaid rollaid sáhtášii dahkat čielgaseabbon ja mo daid gaskasaš ovttasbarggu sáhtášii lasihit. Ođđa ásahus ásahuvvo 2011 loahpas heaittihuvvon Sámi Giellalávdegotti sadjái. Sámi parlamentáralaš ráđi jođiheaddji Egil Olli lea ilus go golmma riikka sámiid giellaovttasbargu nanosmuvva ja dán láhkai lea vejolaš juksat buoret bohtosiid.
Beavttálmahttá ovttasbarggu
-Dan sadjái go juohke sámediggi bargá sierra giellabarggu, de Sámi giellagáldu čohkke vátna fágaresurssaid. Dát beavttálmahttá giellaovttasbarggu, dadjá SPR jođiheaddji Egil Olli.
Sámi giellagáldu
Ođđa ásahusa namman šaddá Sámi Giellagáldu. Ásahusa bargguide gullet giellagáhtten, giela ovddideapmi, terminologiija, báikenammabarggut, giela normeren ja sámi giellafágalaš gažaldagaide guoski diehtojuohkkin. Dasa lassin guovddáš veahkeha gávdnat dieđuid iešguđetge sámegielaid birra ja nanne iešguđetge sámegielaid gaskasaš gulahallama.
SPR áddá Sámi giellagáldui mearridanválddi sámi giellaovttasbargui guoski gažaldagain. Sámi giellagáldu ii šatta fysalaš ásahussan, muhto guovddáža bargit bargagohtet sámedikkiid doaimmahagain Norggas, Ruoŧas ja Suomas. Ásahusas bargagohtet čakčamánu 2012 rájes oktiibuot ovcci ođđa mearreáigásaš giellabargi ja golbma hálddahusbargi.
Davviriikkalaš sámegiela fága- ja resursaguovddáža vuođđudanprošeavtta váldoruhtadeaddjin lea EU-Interreg Rájáhis ovdáneami Sápmi Davvi IV A-oasseprográmma. Dasa lassin prošeavtta ruhtadit sámedikkit, Lapin liitto, Norgga stáhta sihke Romssa- ja Nordlándda fylkkasuohkan. Prošeaktaáigodat lea 01.09.2012 – 30.06.2014.
Sámi parlamentáralaš ráđi jođiheaddji Egil Olli sávvá guovddážii olu lihkku bargguin ovddidit sámegielaid.
Eanet dieđuid:
Sámi parlamentárlaš ráđđi: SPR jođiheaddji Egil Olli. + 47 900 26 880
Norggas: Sámediggeráđđi Ellinor Marita Jåma.
Ruoŧa Sámediggi: Per-Mikael Utsi.
Suoma Sámediggi Klemetti Näkkäläjärvi