Sámediggeráđđi Marianne Balto oassálastá Norgga stuorradiggesáttagoddái mii lea Kanadas njukčamánu 4. – 10. b. Kanada vuolleviesu presideanta, Andrew Sheer, lea bovden stuorradiggepresideantta Dag Terje Andersen. Sámediggi geavaha liibba earret eará lonohallat vásáhusaid First Nations:in guollebiebmama birra.
- Sápmelaččat ja First Nations vásihit ollu seammalágan čuolmmaid akvakultuvrra ja guollebiebmama oktavuođas. Dán áiggi lea ollu norgga guollebiebman Kanadas, mii dahká erenoamáš miellagiddevažžan lonohallat vásáhusaid, dadjá sámediggeráđđi Marianne Balto.
Marianne Baltos galgá earret eará leat sáhkavuorru Sámedikki rolla birra luossahálddašeami oktavuođas semináras Campbell Riveris. Seminára čalmmustahttá erenoamážit luossabiebmama váikkuhusaid álgoálbmogiid árbevirolaš guovlluide.
- Mus leat stuorra vuordámušat mátkái ja doaivvun ahte čoahkkimat sihke First Nations:in ja Kanada vuolleviesuin šaddet ávkkálaččat, cealká sámediggeráđđi Marianne Balto.
Čavga prográmma
Sáttagottis lea čavga prográmma ja dat galgá deaivvadit sihke kanadalaš politihkkáriiguin ja First Nations álgoálbmotáirasiiguin.
Norgga sáttagottis leat muđui mielde Ingalill Olsen (Bb), Per Sandberg (FrP), Siri A. Meling (Ob), Geir Jørgen Bekkevold (RÁb), Anne Tingelstad Wøien (Gb) ja Borghild Tenden (Gb). Mátkkis leat maid mielde ráđđeaddi Liss-Ellen Ramstad Sámedikki hálddahusas, ráđđeaddi Bjørnar Dahl Hotvedt ja seniorkonsuleanta Laila Høge Stuorradikki riikkaidgaskasaš čállingottis.
Gulahallit:
Sámediggeráđđi Marianne Balto, tlf. 480 63 358
Ráđđeaddi Liss-Ellen Ramstad, tlf. 958 09 451