Sámediggeráđi Marianne Balto galledii inuihtaid joatkkaskuvlla mii lea Ottawas. Oahppit bohtet geográfalaččat hui viidát. Oktasaš ášši sis lea go háliidit lohkat iežaset historjjá ja kultuvrra birra, ja leat mielde ovdánahttiime inuihttaservodaga. Dáid nuoraid sáhttá máŋgga ládje lohkat leat boahtteáiggi jođiheaddjit.
- Mun leat bures hirpmahuvvan dán áŋgirvuođas maid dát nuorat čájehit. Sis ledje ollu gažaldagat sápmelaččaid dili birra Norggas, lohká Marianne Balto.
Oahppit besse gullat manin Sámediggi ásahuvvui, movt Sámediggi bargá ja movt bargu lea organiserejuvvon. Oahppit dovddahedje ahte sis lei hui ollu beroštupmi oahppat eanet sámi servodaga birra. Oahppit sáhtte muitalit ahte leat pláneme mátki Norgii moatti mánu geažis. Sii galget dalle fitnat sihke Oslos, Romssas, Kárášjogas ja Guovdageainnus.
Stuoradiggepresideanta Dag Terje Andersen bovdii Sámedikki mielde mátkái Canadai. Lassin almmolaš prográmmii ledje Sámedikkis sierra čoahkkimat álgoálbmogiiguin Canadas. Anne Tingelstad Wøyen (GB), Per Sandberg (OB) ja Geir Jørgen Bekkewold (RÁB) válljejedje čuovvut Sámedikki čoahkkima dán ovdalgaskabeaivvi.
- Mun lean ilus go stuoradiggeáirasat čuovvoledje min deaivvadit álgoálbmotnuoraiguin ja go nu áŋgirit serve dialogii, lohká Balto.
Marianne Balto anii liibba bovdet ohppiid Sámediggái go bohtet Norgii fitnat. Son árvalii maid čoahkkima Sámedikki iežas nuoraidorganisašuvnnain SáNuL:in.
Oahppit ledje čielgasit čeavlát go besse gussiide čájehit oasi iežaset kultuvrras ja čájehedje sihke árbevirolaš dánssa ja čottalávluma, juoga masa geahččit liikojedje bures.
- Mu mielas lei erenoamáš miellagiddevaš gullat ohppiid go muitaledje gielladili birra ja iežaset giela ealáskahttima barggu birra, loahpaha Balto.
Faktadieđut:
Nunavut skuvla ásahuvvui 1985:s, “Board of Directors of the Tungavik Federation of Nunavut” lei mii ásahii dan, vai nuorra inuihtat besset oahppat eanavuoigatvuođaid birra. Dan rájis leat 330 oahppi čađahan eksámeniid skuvllas. Dasa lassin go ožžot oahpu skuvllas, de doibmet oahppit maiddái ambassadevran inuihtaide. Ovddeš oahppit leat dál jođiheaddjit máŋgga suorggis.
Oktavuohtaolmmoš: ráđđelahttu Marianne Balto, tel. 480 63 358