Sámediggeráđđi lea juolludan prošeaktadoarjaga Deanu sámeskuvlii ja Billávuona mearrasámi bajásšaddanguovddážii Porsáŋggus álggahit sámi meahcce- ja luondduprošeavttaid vuođđoskuvllas.
– Sámediggi atná árvvus árbedieđu. Mii háliidit ahte dat máhttu ja gielalaš riggodat mii lea sámegielas, fievrriduvvo ođđa buolvvaide. Mii lea hui ilus go beassat doarjut guokte buori ovddasmanni prošeavtta, mat galget ovddidit árbedieđu oahpahanmálliid vuođđoskuvllas, dadjá Sámedikki várrepresideanta Laila Susanne Vars.
Diimmá bušeahttameannudeamis mearridii Sámediggi várret 500 000 ru ohcanvuđot doarjjan daid vuođđoskuvllaid várás, mat háliidit čađahit prošeavttaid sámi luonddugeavaheami birra iežaset ohppiid várás. Dál ožžot Deanu sámeskuvla ja Billávuona bajásšaddanguovddáš goabbáge juolluduvvot 250 000 ru iežaset prošeavttaid álggaheapmái.
- Sámi kultuvrras lea dievva árvvolaš máhttu, sihke giellatearpmaid dáfus ja geavatlaš árbedieđu dáfus, muhto sámi skuvllat leat ohcalan ruđaid vai besset fállat ohppiide buoret, vuogádatlaš oahpahusa árbedieđus. Danne lean mun ohppiid bealis hui ilus go Deanu sámeskuvla ja Billávuona mearrasámi bajásšaddanguovddáš dál áigot aiddo dan dahkat iežaset ohppiid várás, dadjá Sámedikki várrepresideanta Laila Susanne Vars, geas lea ovddasvástádus oahpahusáššiin Sámediggeráđis.
Prošeavttat galget boahtit ohppiide njuolgga buorrin. Deanu sámeskuvla háliida čalmmustahttit sámi goađi geavaheami, ja mo ávkkástallat rittuin árbevirolaš sámi vuogi mielde. Billávuona bajásšaddanguovddáš áigu čalmmustahttit mearrasámi báikegotti oahppanarenan, deattuhettiin dakkár fáttáid go báikenamaid, njuovvama, duoji, bivddu ja guolásteami.
- Sámediggeráđi bealis sávan ahte maiddái eará skuvllat ge boahtteáiggis movttiidahttojuvvojit áŋgiruššat eanet iešguđet lágan oahpahusain árbedieđus, go dat maid lea buorre vuohki oahppat sámegiela geavatlat barggu bokte. Sávan beassat galledit goappašiid skuvllaid oaidnin dihtii mo prošeavttat ovddiduvvojit, dadjá Vars.
Gulahalli:
Sámedikki várrepresideanta
tel. 97754102, e-poasta: laila.susanne.vars@samediggi.no