Sámediggi bovdii ollu guovddáš olbmuid guolástussuorggis seminárii mearrasámi guolástanstrategiijaid ja višuvnnaid birra “Guolástuspolitihkka mearrasámi ássamii”. Seminára dollojuvvui juovlamánu 3. b. Sámedikki dievasčoahkkimis ja dan oktavuođas. – Mun lean duhtavaš go mii leat ožžon árvalusaid viidáseappot bargui dán deaŧalaš suorggis, dadjá Sámediggeráđi lahttu Silje Muotka.
Čoahkkádus
Seminárii serve sihke almmolaš eiseválddit, ealáhus, fágaolbmot ja earát. Sáhkavuoruid doallit válde vuolggasaji guolástusain ja ássamis mearrasámi guovlluin boahtteáiggi perspektiivvaid deattuhemiin.
–Mun lean ilus go mii ođđa Sámedikkis nagodeimmet čohkket ollu deaŧalaš sámi guolástusovddasteddjiid nu oanehis áiggis maŋŋá válgga seminárii, dadjá Muotka.
Oktasaš vuođđooaidnu
Sámediggi ovttas eará eiseválddiiguin sáhttá váikkuhit positiivvalaš ovdáneami ássama, innovašuvnna ja kultuvrra oktavuođas sámi guovlluin. Semináras fokuserejuvvui boahtteáigi ja servodat-, innovašuvdna- ja ealáhusvejolašvuođat.
– Dát lea álgu ovddos guvlui jurddašeapmái ja ovttas mearrasámi beroštumiiguin háhkat buriid strategiijaid min barggu várás, dadjá Muotka.
Menestus
- Mu mielas mii oaččuimet buriid ja boahtteáigái čujuheaddji árvalusaid semináras gos deaŧaleamos hástalusat mat leat mis ovddabealde bohte ovdan. Seminára lea deaŧalaš álgu viidáseappot bargui mearrasámi áššiid strategiijabargui. Dieinna lágiin fertet dadjat ahte seminárain lihkostuvaimet hui bures, dadjá Sámediggeráđi lahttu Silje Muotka.