Sámediggi lea geassit 2012 fitnan geahččamin 330 vistti “sámi visttiid identifiseren ja registreren” prošeavtta oktavuođas.
Sámediggi álggahii 2011:s, ovttasráđiid Riikaantikvárain, sámi visttiid registrerenprošeavtta. Bargu lea álggahuvvon oktanaga davvisámi guovllus, márkasámi guovllus ja máttasámi guovllus. Prošeavtta oktavuođas galget automáhtalaččat ráfáidahttojuvvon ja veaháš ođđaset sámi visttit identifiserejuvvot, registrerejuvvot ja daid dilli galgá árvvoštallojuvvot. Geahčadeamit leat čađahuvvot Gaala, Árborde, Skániid, Deanu ja Mátta-Várjjaga gielddain.
Sámediggi háliida golmmajagáš prošeavtta bokte registrerehit sámi visttiid mat leat boarráset go 100 jagi go dat leat automáhtalaččat ráfáidahttojuvvon olles Norggas.
Sámi kultur- ja máhttoguoddit
-Boares sámi viesuin leat ollu kvalitehtat main lea deaŧalaš atnit ávviris. Dat muitalit sámi kultuvrra ja identitehta birra, ja danne lea ge deaŧalaš registreret ja suodjalit sámi visttiid, dadjá prošeaktajođiheaddji Mia De Coninck. Dáin visttiin lea divrras kulturárbi, ja dat berrejit sihkkarastojuvvot sámi kultur- ja máhttoguoddin, dadjá De Coninck.
Sámedikki prošeaktajođiheaddji Mia De Coninck dadjá ahte sis lei buorre ovttasbargu viessoeaiggádiiguin geahčademiid oktavuođas geassit. Mii leat gullan ollu miellagiddevaš muitalusaid visttiid birra. Ja mii leat deaivvadan ollu eaiggádiiguin geat leat atnán ávvira dáin visttiin. Viessoeaiggádiidda sáddejuvvo reive čađahuvvon geahčadeami birra 2012 juovlamánu áiggi. Das ávžžuhit maiddái sin ain atnit ávvira dáin visttiin, maid sáhttá buoremusat dahkat dábálaš geavaheami bokte ja go jeavddalaččat bearráigeahččá ja bajásdoallá daid. Jos lea dárbu divodit vistti, de ferte dan dahkat ovttasráđiid Sámedikkiin.
Fitnan geahččamin 330 vistti
Sámediggi lea lohkan 130 áitti, 70 viesu, 24 náveha, 8 eanakeallára ja 3 goađi. Áittit leat geavahuvvon máŋggalágan ulbmiliidda ja leat huksejuvvon máŋgga láhkai. Dat sáhtte leat geahppasat ja ilbmásat dahje lossagat ja lávgalasat. Dat sáhtte leat biddjojuvvon stoalppuid dahje geađgebelkkuid ala. Viesuin ledje vel eanet variašuvnnat, 1, 1 ½ dahje 2 gearddi, 2-lanjat, 4-lanjat, dimbbarpanelat dahje eai. Buot dát visttit muitalit láhkáseaset sámi ássama guovlluin.
Dieđut ja dokumeanttat mat leat čohkkehuvvon dáid visttiid birra galget biddjojuvvot Askeladdenii, mii lea Riikaantikvára kulturmuitodiehtovuđđui. Das sáhttá ohcat ja neahttasiidu gávdno dáppe http://www.kulturminnesok.no/.
Ohcá eaiggádiid ja informánttaid
Sámediggi áigu boahtte jagi dahkat geahčademiid Romssas ja máttasámi guovllus.
Eaiggádušat go don boarráset sámi vistti dahje lea máhttu sámi visttiid birra ja háliidat veahkehit, de váldde oktavuođain Sámedikkiin. Sáhttát áinnas sáddet gova ja dieđuid visttiid birra, dadjá prošeaktajođiheaddji Mia De Coninck.
Prošeaktajođiheaddji Mia De Coninck, tel. 78 47 40 23, mobil 90 79 98 19, e-poasta:
mia.de.coninck@samediggi.no
Prošeaktamielbargi Elin Kristina Jåma, tel. 78 47 40 34, mobil 94 82 59 78, e-poasta:
elin.kristina.jama@samediggi.no
