Djupedal- lávdegoddi lea geigen iežas árvalusa gos gehččet mii dárbbašuvvo vai skuvlabiras sáhttá buoriduvvot ja movt eastadit givssideami skuvllas. Mun lean duhtavaš go lávdegoddi lea evttohan dehálaš doaibmabijuid givssideami ja cielaheami vuostá sámi birrasiin, lohká ráđđelahttu Silje Karine Muotka.
Sámediggeráđis lea leamaš čoahkkin Djupedal- lávdegottiin ja buktán cealkámušaid dán dehálaš bargui.
Lávdegoddi čujuha váilevaš máhttovuđđui givssideami birra sámi ohppiid gaskkas ja sin givssideamis, ja buktá gažaldaga leat go našunála álgagat ja skuvlabirasprográmmat deaivan sámi ohppiid. Dát lea maid dehálaš Sámediggái.
- Mii diehtit ahte gávdnojit heajos guottut sápmelaččaid birra mat bohtet das go lea unnán ođđaáigásaš máhttu min birra, ja mii diehtit oalle sihkkarit ahte sámi mánát šaddet dovdat gutnehuhttima, cielaheami ja givssideami, dan dihte go sii leat sápmelaččat. Earret eará čájehit oahppiiskkadeamit, Álbmotdearvvašvuođainstituhta logut ja dieđut mánáidáittardeaddjis eanet givssideami sámi guovlluin. Mii eat sáhte dohkkehit dan, lohká ráđđelahttu Muotka.
Givssideapmi ja cielaheapmi lea maid sámi ohppiid gaskkas. Ráđđelahttu Silje Karine Muotka oaivvilda ahte lea dárbu eanet diehtojuohkimii dán birra vai sáhttá bidjat johtui rievttes doaibmabijuid. Seammás deattuha son ahte dárbu doaibmabijuide mat buoridit mánáid árgabeaivvi diehttelasat eai sáhte vuordit dutkanbohtosiid.
- Lávdegotti árvalusas eanet ovttasbarggu birra gaskal ruovttu ja skuvlla, ja iežas anti- givssidemiidprográmma johtui bidjamii mii lea heivehuvvon sámi skuvllaide ja sámi duohtavuhtii, oaivvildan mun ahte dehálaš váikkuhangaskaoamit fertejit biddjot johtui jođáneamos lági mielde, lohká Muotka.
Ráđđelahttu Silje Karine Muotka lohká viidáseappot ahte son lea ilus go Djupedal- lávdegoddi evttoha doaibmabijuid, nu go sámegielat oahpponeavvuid mat mielddisbuktet oadjebas psykososiála skuvlabirrasa. Viidáset lea buorre go lávdegoddi evttoha eanet ollislaš ja systemáhtalaš barggu, mii easttada cielaheami ja mielddisbuktá eanet dihtomielalašvuođa skuvllas sámi giela ja kultuvrra birra.
Eanet dieđut:
Ráđđelahttu Silje Karine Muotka, tlf. 984 87 576