Divttasvuona-ášši lea ožžon stuora fuomášumi 2016 geasi rájes. Ášši álggii dainna go 11 divttasvuotnalačča muitaledje VG-aviissas geassemánu 11. beaivvi 2016 ahte sii leat gillán seksuálalaš illástemiid.
151 illástanášši - 82 gillájeaddji
Politiijat leat gávnnahan oktiibuot 151 seksuálalaš illastanášši main leat čanastagat Divttasvutnii. Leat registrerejuvvon oktiibuot 82 gillájeaddji ja 92 várohuvvon illásteaddji. Olu dáin áššiin leat roavva seksuálalaš illásteamit – nu go mánáid veagalváldimat, ja boarráseamos ášši lea dáhpáhuvvan 1953:s. Dan 151 áššis mat leat dutkojuvvon, leat 106 ášši hilgojuvvon áiggehuvvanmearreáiggi geažil. Oktiibuot leat logi áššáskuhttima mearriduvvon.
– Lea bahča gullat dan viidodaga mii Divttasvuona surgadis illástanhistorjjáin lea. Muhto lea sihke buorre ja dárbbašlaš ahte politiijat leat bargan nu dárkilis barggu, dadjá Mikkelsen.
– Dát lea leamaš vejolaš dušše danne go sii geat leat vásihan illástemiid, leat nagodan botket jávohisvuođa dakkár fáttá birra mii guoská midjiide buohkaide. Sámedikki bealis leat mii rámis ja giitevaččat dan givrodaga ovddas maid leat čájehan, dadjá Mikkelsen.
Leat 82 olbmo geat namahuvvojit gillájeaddjin. Gillájeddjiid ahkeviidodat lea 4 jagis 75 jahkái. Sámediggeráđđi Mikkel Eskil Mikkelsen deattuha dehálažžan ahte sii eai galgga báhcit oktonasvuhtii go politiijat dál loahpahit Divttasvuona-ášši prošeaktan.
– Buot deháleamos dál lea ahte illásteami gillájeaddjit Divttasvuonas ožžot dárbbašlaš veahki ja buhtadusa. Seammás diehtit ahte veahkaválddálašvuohta ii čuoza dušše sidjiide geat njuolga vásihit dan. Dat čuohcá olles bearrašii ja buohkaide geain lea lagas oktavuohta dasa. Dat čuohcá olles min servodahkii, dadjá sámediggeráđđi Mikkel Eskil Mikkelsen.
Máŋga instánsa meaddán - ferte ásahit luohttámuša
– Jaskatvuohta ja tabut leat dagahan ahte mánát ja nuorat eai leat ožžon dan suodjalusa maid sis lea gáibádus oažžut. Gillájeaddjit geat leat muitalan iežaset historjjá leat vásihan áitojuvvot. Dehálaš gažaldat midjiide lea movt mii sámi servodahkan sáhttit dagahit rabasvuođa ja luohttevašvuođa, dadjá Mikkelsen.
Raporta "Jus duostat jearrat, de dustet olbmot vástidit" Veahkkeapparáhta ja politiijaid vásáhusat veahkaválddálašvuođain lagas oktavuođain sámi servodagas, čájeha ahte sámi álbmogis váilu luohttámuš veahkkeapparáhttii. Politiijaid loahpparaporta Divttasvuona-áššiid olis čájeha dan seamma.
– Politiijat leat šállošan go sii eai leat bargan doarvái buori barggu geassemánu 2016 rádjái ja leat dál álggahan luohttámušnannejeaddji barggu. Muhto nu go raporta čájeha, de leat maiddái eará veahkkeinstánssat mat leat meaddán, earret eará mánáidgárdi, skuvla, dearvvašvuođadivššár, mánáidsuodjalus, dadjá Mikkelsen.
Guhkit áiggi vuollái lea almmatge dehálaš sihkkarastit ahte veahkkeapparáhtas lea dárbbašlaš gelbbolašvuohta ja kapasitehta sihke dustet ja gieđahallat dákkár áššiid, deattuha Mikkelsen. Dás lea earret eará sáhka gielddalaš dearvvašvuođabálvalusas mas lea gelbbolašvuohta sámi gielas ja kultuvrras, ja ahte psyhkalaš dearvvašvuođasuodjalus, nu go SÁNAG, oažžu kapasitehta dustet veahkaválddálašvuođa ja illástanáššiid dohkálaš vugiin.
– Sámedikki bealis áigut čuovvolit dán iežamet barggus, dadjá Mikkelsen. Earret eará oaidná Sámediggi dárbbašlažžan ollislaččat guorahallat Divttasvuona-ášši, ja maiddái dan movt eará veahkkeinstánssat gieđahallet váidojuvvon áššiid ja fuolahusdieđihemiid.
Jus leat gažaldagat, váldde oktavuođa sámediggeráđiin Mikkel Eskil Mikkelseniin, mob. 917 42 161