Sámediggeráđđi lea juolludan 400 000 ru nuorra álggaheddjiide guolástusain. guollebivdi Magnus Olsen Návuonas eret ja Stjernøy Kystfiske AS leat goabbá ge ožžon 200 000 ru.
- Illudan go Davvi-Norgga nuorat háliidit bargagoahtit guolásteaddjin. Ovdáneapmi guolástusain maŋimus jagiid lea dagahan guolásteami hui kapitálagáibideaddjin, erenoamážit álggaheaddji nuoraide. Mii sávvat ahte doarjagat guhkit áiggi vuollái buoridit rekrutterema ealáhussii, dadjá Silje Karine Muotka.
Sámediggeráđđi lea dán vuoru juolludan ruđaid fanasinvesteremiidda. Muotka deattuha ahte Sámediggeráđđi háliida nannet olles ealáhusa infrastruktuvrra, ja čujuha dasa ahte ealáhusa oassálastit sáhttet maiddái ohcat doarjaga vuostáiváldinrusttegiidda ja bálvalusrusttegiidda olles báikkálaš riddo- ja vuotnaguolásteddjiid várás.
– Min ulbmil lea nannet riddoservodagaid guolástanealáhusa, ja dalle lea midjiide hui deaŧalaš sihkkarastit rekrutterema fidnui. Muhto nuorra álggaheddjiide lea gáibideaddji sihkkarastit ruhtadeami sihke fatnasii ja eriide.
Gulahalli
Sámediggeráđđi Silje Karine Muotka, tel. +47 984 87 576