Sámediggeráđđi juolluda 100 duhát ruvnnu Gáldu álgoálbmotvuoigatvuođa gelbbolašvuođaguovddážii lágidit seminára boazodoalolága ja álbmotrievtti birra. Boazosámiin lea dárbu diehtit eanet dán suorggis, vai buorebut ákkastallat iežaset vuoigatvuođaid.
Boazodoallit leat bivdán Gáldus oažžut čiekŋaleappo láhkaáddejumi sihke našunála ja riikkaidgaskasaš dásis, ipmirdan dihtii sin vuoigatvuođaid. Dán semináras lea fokus boazodoallolága ráŋggáštanvugiide, nugo boazologuheiveheapmái, man proseassa boazodoalus leat gažadišgoahtán ja moaitán.
Sámedikki ráđđelahttu Thomas Åhren lohká dehálažžan loktet boazodolliid gelbbolašvuođa boazodoallolágas ja álbmotrievtti birra.
-Boazologuheiveheapmi lea okta boazodoalu stuorámus hástalusaiguin, ja dál lea ášši masa Sámediggi lea bidjan olu fuomášumi. Mii leat deattuhan ahte lea dehálaš vuoruhit diehtojuohkima boazodolliide, ja leat lea hástalan boazodoalloeiseválddiid dán dahkat.
Åhren mielas diehtojuohkin mii eiseválddiid beales lea dahkkon ii leamaš doarvái buorre. Dat ahte boazodoallit leat váldán oktavuođa Gálduin čájeha dan stuora diehtodárbbu mii boazodolliin lea boazologuheivehanproseassa oktavuođas.
-Dán seminára doarjuma bokte Sámediggi dáhttu váldit oasi ovddasvástádusas ahte boazodolliin leat doarvái dieđut ja mahttu dáid proseassaid birra, go jo boazodoalloeiseválddit eai leat dan dahkan, lohká ráđđelahttu Thomas Åhren.
Eanet dieđut: Sámedikki ráđđelahttu, Thomas Åhren, 908 39 663