Sámediggeráđđi juolluda gitta 165 000 ru Hemnes ubmisámi forumii ubmisámegiela sátnegirjeprošeavtta gárvvisteapmái ja ubmisámegiela sátnegirjji almmuheapmái, mas leat 4 300 ubmisámegiela sáni.
Cuoŋománu 6. b. 2016 dohkkehii Sámi Parlamentáralaš Ráđđi ubmisámegiela ortografiija almmolaččat. Dál lea bargu sátnegirjji maŋimuš osiin báhcán, ja girji galgá almmuhuvvot 2018:s.
– Deaŧalaš giela seailumii ja ovddideapmái
– Ubmisámegiela terminologiija sátnegirjjis sáhttá buoridit áddejumi ja máhtu sámi eallinvuogis, sihke meahccesámi ja duottarsámi birrasis. Sátnegirji lea mielde nannemin sámi jurddašanvuogi ja sámi árbevieruid sisdoalus bokte.Eai leat šat nu galle olbmo geat hupmet ubmisámegiela Norgga bealde, muhto Ruoŧa bealde leat eambbosat geat hupmet ubmisámegiela. Prošeavtta bokte galget sátnegirjjis addojuvvot ubmisámegiela-ruoŧagiela ja ruoŧagiela-ubmisámegiela veršuvnnat. Ruoŧagielat veršuvdna lea áibbas vealtameahttun vai maŋŋá sáhttá addit veršuvnna dárogillii, ja dat boahtá nu ávkin sámi servodahkii Norgga bealde.
– Ubmisámegiela ceavzimii ja ovddideapmái lea sátnegirji hui deaŧalaš, beroškeahttá čilgejuvvojit go sánit dárogillii vai ruoŧagillii. Sátnegirji lea vealtameahttun deaŧalaš oahppogirjjiid buvttadeapmái ja eanet oahpahusávdnasiid buvttadeapmái ubmisámegillii, dadjá Keskitalo.
Nannet ja bisuhit oskugiela
Maiddái guokte eará sámi giellaprošeavtta leat ožžon doarjaga sámediggeráđis.
Guovdageainnu báhppasuohkan oažžu gitta 300 000 ru rádjai árbevirolaš sámi oskugiela nannemii ja bisuheapmái. Plána ja ulbmil lea čohkket mánáid, nuoraid ja rávisolbmuid oktasaš čoagganemiide gos hubmojuvvo oskugiella ja geavahuvvo terminologiija. Guovdageainnu báhppasuohkan lea fuomášan ahte boahtteáiggi sohkabuolvvain lea unnán máhttu ja váilu áddejupmi oskugiela birra.
– Vaikko Guovdageainnus hubmojuvvo sámegiella beaivválaččat, de lea dárbu ahte mánát, nuorat ja rávisolbmot deaivvadit sámegiela nannema dihtii, dadjá Keskitalo.
Sámegielkursa
ABC Company E-skuvla AS oažžu gitta 300 000 ru rádjai SAAL 2 kurssa doallamii Kárášjogas. Dát lea joatkka sámegielkursa sidjiide geat máhttet sámegiela veaháš ja leat čađahan SAAL 1 kurssa.
– Deaŧalaš lea ahte sii geat eai máhte sámegiela nu bures ožžot vejolašvuođa oahppat eanet sámegiela, vai sii šattašedje funkšonealla guovttegielagin. Go amasgielagat ohppet sámegiela, de geavahuvvo sámegiella eanet beaivválaččat bargosajiin ja priváhta, dalle ii dárbbaš geavahit dárogiela váldogiellan, iige geavahit dulkka, dadjá Keskitalo.
Govat sámediggepresideanttas Aili Keskitalos
Eanet dieđuid oaččut go válddát oktavuođa Sámedikki presideanttain Aili Keskitalo +47 971 29 305