Árran julevsámi guovdásj lea daid searvvis geat ožžot doarjaga Sámedikki dearvvašvuođaruđain 2014:s. Ruđaid ulbmil lea ovddidit dásseárvosaš dearvvašvuođa- ja sosiálabálvalusaid sámi álbmogii.
- Jus galgá juksat ovttaárvosaš dearvvašvuođa- ja sosiálabálvalusaid sámi álbmogii, de ferte lasihit máhtu sámi buhcciid ja geavaheddjiid dárbbuid birra buot dásiin. Mii juolludit jahkásaččat sullii 2,8 miljon ru sierranas prošeavttaide mat ovddidit dán ulbmila, cealká ráđđelahttu Henrik Olsen.
Árran julevsámi guovdásj Divttasvuonas lea ožžon 82 000 ru lágidit seminára julevsámi álbmoga dearvvašvuođa ja eallindiliid birra.
- Plánejuvvon seminára veahkeha háhkat máhtu dearvvašvuođa ja eallindiliid birra julevsámi guovllus. Sávaldahkan lea ahte seminára galgá váikkuhit eanet dutkama fáttá birra, cealká Henrik Olsen.
Evenášši suohkan oažžu 20 000 ru heivehit áicogárddi buohcceviesu geavaheddjiide
