Sámediggeráđđi juolluda 463 000 ru. Lenangen Brygge AS:ii Ivgus. Fitnodat áigu fállat barttaid ja eará vuogasvuođaid lustabivdiide meara alde ja čuoigan- ja dálvedoaimmaid Ivgogáissiin.
– Ivgoguovllus lea ávkkástallan báikkálaš resurssaiguin ja kultuvrrain ovdánan bures, ja dat lea ge dakkár ovdáneapmi maid mii háliidit doarjut. Kultur- ja luondduturismmas davvin leat stuorra vejolašvuođat, ja Sámediggi háliida láhčit ovdáneapmái báikkálaš ealáhuseallimii, dadjá sámediggeráđđi Silje Karine Muotka.
Muotka deattuha ahte Ivgu lea hui deaŧalaš dan oktavuođas ahte vásihit Davvi-Norgga sihke meara alde ja váris. Mátkeealáhusfálaldagat gielddas leat lassánan maŋimus jagiid, ja Sámediggi lea juolludan doarjagiid máŋga ođđaálggahemiide. Lenangen Brygge AS lea maid ožžon investerendoarjaga Innovašuvdna Norggas.
– Ivgu lea dál šaddan dovddus mátkeealáhusa mearusbáikin sihke čuoigamiid ja guolástan- ja vázzinturismma oktavuođas. Givrodahkan lea maiddái ahte eaiggádat doibmet juo árjjalaččat guolástusas ja nu sii leat mielde nannemin sihke ealáhusdoaimmaid ja ássama guovllus, deattuha Muotka.
Gulahalli
Sámediggeráđi Silje Karina Muotka, tel. +47 984 87 576
Govva: Simo Räsänen via Creative Commons Attribution-Share Alike 3.0 Unported license.