Sámedikki várrepresideanta Henrik Olsenšálloša go plána ásahit máŋggakultuvrralaš guovlomedisiinnalaš guovddážat Divttasvutnii heaittihuvvo. Sámediggi attii 2013 geasi ekonomalaš doarjaga dakkár guovddáža čielggadeapmái.
- Mii ain doarjut jurdaga, ja oaivvildit ahte dat lea sihke buorre ja dárbbašlaš. Sámi álbmogis Divttasvuonas ja Davit Sálttus lea eahpitkeahttá dárbu dakkár dearvvašvuođa- ja sosiálabálvalusaide mat fuolahit sámi giela ja kultuvrra ja suohkanat leat geatnegahttojuvvon láhčit dásseárvosaš bálvalusaide go dakkár dárbbut bohciidit, dadjá várrepresideanta Henrik Olsen.
2005:s álggahuvvui bargu ásahit heivehuvvon dearvvašvuođafálaldaga julevsámi álbmogii, dat mii dalle gohčoduvvui “Sámi dearvvašvuođaguovddáš julevsámi guovllus”. 2008:s viiddiduvvojedje plánat dan jurdagii ahte ásahit bistevaš máŋggakultuvrralaš dearvvašvuođa- ja sosiálafágalaš fálaldaga, heivehuvvon sámi kultuvrii julevsámi guvlui Nordlánddas. Sámediggi juolludii dán geasi 240.000 ruvnnu prošeavtta čielggadeapmái. Várrepresideanta Henrik Olsen ipmirda ahte suohkan ii sáhte čađahit prošeavtta okto, ja sávvá ahte buot guoskevaš suohkanat sáhtášedje geatnegahttojuvvot dakkár čovdosii.
- Mii fertet buohkat ohcat čovdosiid dán prošektii, mii sáhttá leat mielde buorideamen dearvvašvuođa- ja sosiálabálvalusaid julevsámi álbmogii. Sámediggi lea investeren hui ollu resurssaid dasa ahte nannet vuođđodearvvašvuođafálaldaga julevsámi álbmogii máŋga jagi. Muhto mii eat lihkostuva dáinna jus guoskevaš suohkanat eai leat proseassa árjjalaš eaiggádat. Danne ávžžuhan garrasit joatkit prošeavtta, loahpaha Olsen.
Gulahalli
Várrepresideanta Henrik Olsen, tel. +47 907 75 219
