Sámediggeráđđi juolluda 350 duhát ruvnno nuorra entreprenevrraide, Ungt Entreprenørskap Finnmark AS:ii, bargat ealáhushutkamiin skuvllain sámi suohkaniin Finnmárkkus.
Ungt Entreprenørskap lea ideála, riikkaviidosaš organisašuvdna mii ovttasbargá skuvllaiguin, ealáhuseallimiin ja eará aktevrraiguin mat barget ovdánahttit mánáid ja nuoraid hutkáivuođa, hábmenmovtta ja iešluohttámuša. Ungt Entreprenørskap-searvvis leat naššuvnnalaš čállingoddi ja 17 fylkkaorganisašuvnna.
Loga eambbo Ungt Entreprenørskap birra:
Ungt Entreprenørskap galgá kurssaid lágidit ja čuovvolit skuvllaid, oahpaheddjiid, bagadalliid ja skuvlajođiheddjiid geat barget entreprenevra-doaimmaiguin sámi guovlluin.
-Visot árvoháhkan álgá skuvllas. Dákkár prošeavttat leat mielde addime ohppiide ja nuoraide gálggaid, máhtu, guottuid ja návccaid oaidnit sin iežaset ja lagasservodaga árvvu, ja addime reaidduid ja fierpmádaga dahkat juoidá dáiguin árvvuiguin. Báikkálaš identitehta, rámisvuohta iežas kultuvrra ja giela dáfus leat guovddáš áššit jus nuorat galget háliidit ásaiduvvat sámi guovlluide maŋŋel go gerget oahpuin, lohká sámediggeráđđi Ann-Mari Thomassen.
-Sámedikki ulbmil lea bargat nanu ja máŋggabealat ealáhuseallima ovddas, ealáhuseallima ovddas mii lea vuođustuvvon ja mii váldá vuhtii sámi kultuvrra, luonddu ja birrasa, ja ealáhuseallima ovddas mii bidjá vuođu eallinnávccalaš báikkálaš servodagaide gos olbmot háliidit orrut. Danne doarjut mii Ungt entreprenørskap-prošeavtta mii sáhttá leat mielde hábmeme dákkár servodagaid, lohká sámediggeráđđi Ann-Mari Thomassen.
Eambbo dieđut: Sámediggeráđđi Ann-Mari Thomassen, 900 57 123