Dássážii dán jagi leat 18 olbmo ožžon doarjaga Sámedikkis oastit bivdofatnasa. Sámediggi lea juolludan 4 189 000 ruvnno doarjaga fanasoastimii ja dasa reaidduid, nannendihte rekruterema guolástusealáhusas.
Sámediggi lea 2015:s vuoruhan doarjut nuorra guolásteddjiid geat vuosttaš gearddi áigot investeret bivdofatnasa.
-Sámediggi háliida nannet rekruterema guolástanealáhussii, vai nanusmahttá ássama mearrasámi guovlluin, lohká sámediggeráđđi Silje Karine Muotka.
Dušše ráđđečoahkkimis golggotmánu 6.beaivvi 2015 juolluduvvui doarjja 4 ohcamii, oktiibuot 1 297 000 ruvnno.
-Dákkár vuoruheapmi váikkuhangaskaomiin mielddisbuktá nanu vejolašvuođaid sáhttit álggahit fidnui iežas fatnasiin, lohká Muotka.
Sámediggi lea juolludan 323 000 ruvnno doarjaga Lyngen Mekaniske Verksted Ivgus, divodit káijarusttegiid ja investeret govdokáija. 222 000 ruvnno juolluduvvui doarjjan Johnny Johansenii Davvenjárggas investeret bivdofatnasa ja dasa reaidduid.
Suovdifisk AS Porsáŋggus oaččui juolluduvvot 275 000 ruvnno oastit bivdofatnasa ja reaidduid oastimii. Juolluduvvui maiddái 400 000 ruvnno Ketil H. Kollstrømii Deanus, oastit bivdofatnasa ja dasa reaidduid.
Sámediggeráđđi Silje Karine Muotka muitala maid ahte sámediggeráđđi lea juolludan 400 000 ruvnno Vågøy Fisk AS:ii Návuona suohkanis, investeret bivdofatnasa, ja dasa reaidduid ja ávdnasiid.
-Ulbmillaš váikkuhangaskaoami geavaheapmi mielddisbuktá ahte bivdofatnasat ođasmahttojuvvot, bisuheami vuostáiváldinbáikkiin báikkálaš vuođđoávdnasiid várás ja nanne ođđarekruterema guolástanealáhussii, lohká Muotka. Sámediggi háliida seailluhit ja ovddidit mariidnaealáhusaid danin go dat leat dehálaš kulturfievrrideaddjit ja bargoaddit mearrasámi guovlluin, lohká Muotka.
Eanet dieđuid oaččut dás: Sámediggeráđđi Silje Karine Muotka, 984 87 576