Gáisi, Gáivuona ja Omasvuona giellaguovddážat áigot čađahit oktasaš prošeavttaid ja fállat mánáide ja nuoraide ođđaáigásaš sámi giellaarenaid. Sámediggi juolluda 465 200 ru doarjaga
Arenat galget dievasmahttit oahpahusa skuvllas ja veahkehit nuoraid giellaahtanuššamis, ja áigumuš lea fállat aktivitehtaid main árbevirolaš máhttu ovdan buktojuvvo ođđaáigásaš vuogi mielde, go giellaguovddážat doivot ahte dat geasuha mánáid ja nuoraid.
Olahusjoavkun leat mánát ja nuorat gaskal 6 ja 15 jagi Omasvuonas, Gáivuonas ja Romssas geain sámegiella lea fágasuorggis.
-Mu mielas lea buorre go Gáisi, Gáivuona ja Omasvuona giellaguovddážat ovttas áigot lágidit prošeavttaid. Giellaguovddážiin lea deaŧalaš bargu, ja ovttas sáhttet dat juksat ollu mánáid ja nuoraid. Dasa lassin diehtit ahte giellaarenat gos nuorat sáhttet deaivvadit eará nuoraiguin geat leat seamma dilis lea buorre giellaahtanuššamii, dadjá Sámedikki presideanta Aili Keskitalo.
Sámedikki presideanta doaivu dál ahte ollu nuorat dieđihit čoagganemiide, mat sáhttet leat sihke sosiála ja gos ohppet ollu.
-Mun ávžžuhan nuoraid dieđihit. Sáhttá leat váttis leat sámegieloahppi skuvllain gos dárogiella lea váldogiellan, muhto mun dieđán hui bures ieš man buorre lea boahtit sajiide gos mii sáhttit geavahit giela ja leat ovttas earáiguin geat maid leat oahppamin sámegiela, dadjá Sámedikki presideanta Aili Keskitalo loahpas.
Eanet dieđuid addá: Sámedikki presideanta Aili Keskitalo, tel 971 29 305
Loga eanet sámi giellaguovddážiid birra:
https://www.sametinget.no/Spraak/Snakk-samisk-te-mae/Artikler/Samiske-spraaksentre
https://www.sametinget.no/Spraak/Forvaltningsomraade/Tettere-samarbeid-mellom-Sametinget-og-spraaksentrene
Gáisi giellaguovddáš:
http://www.tromso.kommune.no/hjem.154319.no.html
Omasvuona giellaguovddáš:
http://www.spraaksenter.no/
Sámi giellaguovddáš Gáivuonas:
http://www.kafjord.kommune.no/samisk-spraaksenter.2862.no.html