Čađahaniskamušas árvvoštallojuvvo movt Beaivváža doaibmi dárbbuid buoremusat sáhttá ollašuhttit boahtteáiggis. Ollislaš árvvoštallama mielde evttoha stáhta huksenfitnodat Statsbygg unnit areálarámma, 2 800m2 BTA.
– Sámediggeráđđi doarju čađahaniskamuša konklušuvnna ahte sámi joatkkaskuvlla ja boazodoalloskuvlla ja teáhtera oktii lokaliseren lea ulbmilleamos ja attášii eanemus positiiva doaibmavejolašvuođa, dadjá Mariann Wollmann Magga.
Čađahaniskkadeamis geahčaduvvojit čieža vejolaš konseapta, main guokte leat árvvoštallojuvvon dárkileappot: Ođđa vistti sturrodat unniduvvo, ja ođđa visti ovttas Sámi joatkkaskuvllain ja boazodoalloskuvllain.
– Dát lea čađahaniskamuš ja prošeavttas lea ain stuorra eahpesihkarvuohta. Rehkenastimat leat danne ain rahpasat, ja leat ráhkaduvvon govdadis vejolašvuođain, muitala Magga.
Iskamuša konklušuvdna lea ahte Beaivváš sámi našunálateáhtera dárbu ođđa lokálaide lea bures ákkastuvvon. Sihke sierra ođđa visti ja ođđa visti oktii lokaliserejuvvon Sámi joatkkaskuvllain ja boazodoalloskuvllain leat árvvoštallojuvvon buorrin ja realisttalaš molssaeaktun. Oktiilokaliserenmolssaeaktu addá eanemus positiiva ovttasdoaibmanvejolašvuođaid báikegoddái ja sámi birrasii.
Čađahaniskamuša konklušuvnna ja rávvema vuođul bivdá Sámediggi Statsbygg ja guoskevaš departemeanttaid eanet čielggadit oktiilokaliserenmolssaeavttu, dainna lágiin ahte Statsbygg oažžu ođđa bargogohččuma dan birra.
– Sámediggi lea duhtavaš raportta rávvagiin mas areálarámma lea 2 800 m2 BTA Beaivváš sámi našunálateáhtera ođđa teáhtervistái. Sámediggeráđđi áigu bivdit Kultur-, Máhtto- ja Gielda- ja ođasmahttindepartemeanttaid ovttas Sámedikkiin addit Statsbyggii bargamuššan čielggadit oktiilokaliserenmolssaeavttu ain eanet, dadjá Magga, guhte vuordá ahte dat dahkkojuvvo jođánit.
– Mii leat oaidnán man guhkes áigi juo lea mannan. Dát ferte dahkkot jođánit ja mun sávan ahte sáhttit bidjat áigemeari vai oažžut čielggaduvvot leago ávki bargat viidáseappot dáinna molssaeavttuin, dadjá sámediggeráđđi Mariann Wollmann Magga.
Jus áiggut jearahallama, riŋges sámediggeráđđái Mariann Wollmann Maggai, mob. 97702350.