Guovdageainnu nuoraidskuvla pláne ásahit ovttasbarggu verddesiiddain. Siida galgá šaddat bistevaš verddesiidan skuvlii, gosa oahppit oktan oahpaheddjiiguin sáhttet mannat oahppat boazodoalu ja verddestallama birra ja oahppat maid verdde bargá boazodoalus. Oahppit galget oassálastit eanaš boazodoalu bargguide ja doaimmaide mat čuvvot lunddolaččat boazodoalu boazojagis.
Prošeavtta barggut ja doaimmat galget filbmejuvvot ja ráhkaduvvot oahpponeavvun, mii seammás šaddá duođaštussan dasa movt oahpahanarena sáhttá sirdojuvvot eret luohkkálanjas.
Duodji eanaš fágaide
Guovdageainnu nuoraidskuvla galgá maid oažžut ohppiid oahpásnuvvat iešguđetlágán duodjemálliide sihke davvi-, julev- ja lullisámi guovlluin. Oahpaheaddjit galget oahpásnuvvat ja árvvus atnigoahtit duodjeoahpahusa buot fágain, ovddidan dihte sámi skuvlla sisdoalu ja ohppiid árbevirolaš máhtu.
Duodjeoahpahus galgá oažžut saji eanaš skuvlafágaide, ovdamearkka dihte galget oahppit oahppat matematihka duoji bokte.
– Dehálaš ahte árbevirolaš máhttu nannejuvvo skuvllas
Sámediggeráđđi Juhána Biera Biret Márjá/Berit Marie P.E. Eira lohká goappašat prošeavttaid dehálaš gaskaoapmin dasa movt viidáset fievrredit árbevirolaš máhtu skuvllas.
– Min mielas lea dehálaš ahte árbevirolaš máhttu nannejuvvo skuvllas. Dát prošeavttat lea mielde ovddideame sámi giela, identitehta ja árbevirolaš máhtu sirdima, go oahppit praktihkalaš bargguid ja doaimmaid bokte ohppet sámi boazodoalu sániid ja doahpagiid.
Eira dadjá ahte sámi skuvllain galgá leat sámi sisdoallu, mas oahppit galget sáhttit dovdát ja iežaset identifiseret iežaset sámi kulturárbbiin ja gielain.
– Go oahppit barget dákkár prošeavttaiguin, de sii šaddet rámis iežaset sámi identitehta ja kulturárbbi dihte, ja sii šaddet maid oadjebassan iežaset identitehtas, dadjá Eira.
Jus leat gažaldagat, váldde oktavuođa sámediggeráđiin Juhána Biera Biret Márjá/Berit Marie P.E. Eira, mob. +47 913 28 626.
Govat sámediggeráđis ja/dahje ráđđelahtus Juhána Biera Biret Márjjás