Dán jagi lea 848 mánás Norggas sámi mánáidgárdefálaldat. Diibmá lei lohku 758.
– Mu mielas lea hui buorre go Sámedikki áŋgiruššan mánáidgárdefálaldagain lea buktán bohtosiid. Eanet ja eanet mánát ožžot sámi mánáidgárdefálaldaga, ja dat lea hui buorre. Boahtteáiggi giellageavaheaddjit han leat dáin mánáidgárddiin, ja Sámedikki beales háliidat mii čielga áŋgiruššama mánáid árgabeaivvi ektui mánáidgárddiin, dadjá sámediggeráđđi Mikkel Eskil Mikkelsen.
Vuoruhedje giellabarggu nannema mánáidgárddiin
Sámediggeráđđi Mikkel Eskil Mikkelsen
Dán jagi lea juolluduvvon doarjja 19 ovddidanprošektii main fokus lea mánáidgárddi beaivválaš giela nannen báikkálaš árbevirolaš sámi kultuvrra bokte.
Earret eará lea addojuvvon doarjja sierra sámi giellabargiide, giellačeahppi/gielebarkije, mánáidgárddiin sihke davvi- ja máttasámi guovllus.
– Prošeavttaid nugo giellačeahppi/gielebarkije lea dálá sámediggeráđđi válljen vuoruhit danne go mii háliidat nannet sámegiela mánáidgárddiin lassin beaivválaš bargiide. Dat addá mánáidgárddiide rámma bargat giellabargguin ja doaibmat deaŧalaš resursan mánáidgárddiide erenoamážit mánáidgárddiin mat leat olggobealde guovddáš guovllu, dadjá Mikkelsen.
Dán jagi juolludemiin vuoruhii Sámediggeráđđi maiddái ođđa mánáidgárdefálaldaga ásaheami. Troanddima gielda oažžu 300 000 ru ođđa sámi mánáidgárddi ásaheapmái Troanddima gielddas.
Sámediggeráđđi lea maiddái juolludan doarjaga pedagogalaš ávdnasiidda. Dán jagi lei dušše okta ohcci dán ortnegis. Davvi Girji AS lea ožžon 1 568 800 ru pedagogalaš ávnnaspáhkaid ráhkadeapmái mat movttiidahttet áicat ja leat fysalaččat aktiiva.
Juolludusat mánáidgárddiide miehtá riikka
Sámediggeráđđi juolludii maiddái 7 120 000 ru doarjaga sámi mánáidgárddiide ja norgga mánáidgárddiid sámi ossodagaide. Doarjja lea juolluduvvon 31 mánáidgárdái, sihke priváhta ja gielddalaš sámi mánáidgárddiide ja ossodagaide.
Dasa lassin lea juolluduvvon 2 535 000 ru doarjja sámi giellaoahpahussii mánáide norgga mánáidgárddiin. Dát doarjja addojuvvui 31 mánáidgárdái miehtá riikka.
– Sámedikki doarjjaortnegat leat mielde dahkamin erohusa. Mánáidgárddit miehtá Norgga sáhttet dál nannet fálaldagaset ja addit mánáide buoret sámegielat árgabeaivvi doarjjaortnega geažil. Midjiide lea deaŧalaš ahte mánát leat fokusis ja bargat dan ala ahte mánáin lea buoremus fálaldat ja dán jagi juolludusat leat deaŧalaččat dán mihttomeari juksamii, dadjá Mikkelsen loahpas.
Jus leat gažaldagat, dahje áiggut jearahallat, de váldde oktavuođa sámediggeráđiin Mikkel Eskil Mikkelsenain, mob. +47 917 42 161.