Sámediggeráđđi Silje Karine Muotka dadjá ahte lea hui ollu behtton mearrádusa geažil maid Ealáhus- ja guolástusdepartemeanta lea dahkan.
– Ruvki váldá eallima vuonas ja rihkku boazodoalu vuođul guovllus, dadjá Muotka.
-Stáhta iežas fágaetáhtat Guolástusdirektoráhta ja Mearradutkaninstituhtta vuostálastet plánaid, danne go ruvkedoaibma billista iešguđege guliid deaŧalaš gođđan- ja ahtanuššanguovlluid Riehpovuonas, ja danne rihkku ja gieldá sámi kultuvrra kulturvuođu guovllus gos lea juo stuorra áitta dadjá sámediggeráđđi Silje Karine Muotka.
–Mearraduvdni billista olles vuona máŋggaid sohkabuolvvaid badjel, ja billista riddo- ja vuotnabivddu mii lea ahtanuššamin bures, ja dat lea dohkketmeahttun.
Nussir ASA oaččui 2016 loahpas luoitinlobi ásahit mearraduvnni Riehpovutnii nuoskkidanlága mielde. Ealáhus- ja guolástusdepartemeanta lea dál meannudan doaibmalobi minerálalága mielde, ja lea addán Nussir ASA:i doaibmakonsešuvnna minerálalága mielde.
https://www.imr.no/hi/nyheter/2018/april/repparfjorden-gyting-skjer-i-deponiomradet
Áitá boazodoalu
Váikkuhančielggadusat čájehit ahte johtingeainnut ja guoddinsajit billašuvvet ruvkedoaimma geažil Nussiris ja Gumpenjunis Fálesnuori gielddas. Dát čuohcá buot bearrašiidda, ja sáhttá ahte fertejit heaitit boazodoaluin, danne go lea veadjemeahttun bargat ceavzilit ja ekonomalaččat gánnáhahtti boazodoaluin guovllus.
-Sihke Stáhta boazodoallohálddašeapmi, Norgga Boazosámiid Riikasearvi (NBR) ja orohagat dadjet ahte šaddá veadjemeahttun bargat boazodoaluin guovllus, vaikki biddjojuvvojit eavttut váidudeaddji doaibmabijuide, man lágan gelbbolašvuođa lea Ealáhus- ja guolástusdepartemeanttas ahte oaivvildit juste nuppe láhkai, dadjá Muotka.
Muotka lea maiddái hui kritihkalaš go Ealáhus- ja guolástusdepartemeanta ii leat dahkan makkárge servodatekonomalaš analysat ruvkedoaimmas. Departemeanta maid ii lea árvvoštallan makkár váikkuhusat ovddeš ja plánejuvvon duohtademiin lea guovllu boazodollui.
–Mii oaidnit ahte prošeakta ii várra leat servodatekonomalaččat gánnáhahtti ja Ealáhus- ja guolástusdepartemeanta guođđá riskka boahttevaš sohkabuolvvaide ja sámi kultur- ja ealáhusbargiide.
Váidit mearrádusa
Sámedikki presideanta Aili Keskitalo dadjá ahte Sámediggi áigu váidit mearrádusa Gonagassii Stáhtaráđis. Presideanta maid ii jáhke ahte seriøsa aktevrrat bidjet ruđaid prošektii, go vuosteháhku sámi servodagas lea nu stuoris.
Eanet dieđuid addiba:
Sámedikki presideanta Aili Keskitalo: tel 971 29 305
Sámediggeráđđi Silje Karine Muotka, 984 87 576