Sámediggi bidjá dál ođđasit návccaid duodjeealáhusa ovddideapmái fitnodatovdánahttinprográmma bokte Dáhttu Duodji. Dát lea prográmma mii lea heivehuvvon duojáriidda geaid niehku lea eallit dujiin.
12 duojára Sámis leat ožžon saji prográmmii mas earret eará galgá bargat fitnodatovdánahttimiin, innovašuvnnain ja márkanfievrridemiin. Oasseváldit deaivvadit golmma čoagganeapmái ovtta jagis, ja ožžot dasa lassin 50 ráđđeaddidiimmu guhtege ovddidit iežaset fitnodaga.
- Dá lea áibbas ođđa áŋgiruššan duoji ovddas Sámediggeráđi bealis. Duodji lea okta dain deháleamos kulturguddiin man mii fertet gáhttet. Seammás lea maid gelddolaš ealáhussuorgi mas lea buorre vejolašvuohta ovdánit. Mii sávvat Dáhttu Duodji- prográmmain ahte duojárat besset ovddidit iežaset fitnodaga ja oažžut veahki dinet eanet ruđa iežaset buktagiin.
Vuosttaš čoahkkaneapmi lea Kárášjogas juovlamánu 9.-10.b. Prográmmii lea leamaš stuora beroštupmi ja čuovvovaš 12 duojára leat ožžon saji prográmmii:
- Heidi Gaup, Kárášjohka
- Pia Jannok
- Heidi Persen, Áltá
- Linn Muotka, Vuonnabahta
- Jorunn Jernsletten, Vuonnabahta
- Inga Máret Ánne Utsi Sara, Guovdageaidnu
- Johan Ánde Máhtte Somby Sandvik, Kárášjohka
- Ovvlá Gaup, Guovdageaidnu
- Geir Arne Berg, Murgosvuodna
- Ellen Sara Eira Buljo
- Torill Kaino, Ramfjordbotn
- Inga Porsanger, Kárášjohka
Prográmma lea Kreativ Industri ráhkadan, Sámedikki bivdima vuođul. Dát lea oassi duoji ealáhusšiehtadusas mii jahkásaččat šiehtadallojuvvo gaskal Sámedikki ja duodjeealáhusorganisašuvnnaid Sámiid Duodji ja Duojáriid ealáhussearvvi. Sámediggi lea árabut jagis bidjan johtui guokte eará Dáhttu-prográmma mat leat oaivvilduvvon sámi kulturealáhusaide Romssas ja Finnmárkkus.
Gulahallanolmmoš:
Sámediggeráđđi Ann-Mari Thomassen tlf: 900 57 123