Sámedikkis lea 2013 rájes ođđa ohcanvuđot doarjjaortnet. Áŋgiruššan sámi dáiddáriiguin lassána ođđa ortnegiin. – Kulturdieđáhusa vuođul mii háliidit buoridit ođđa sámi dáiddáriid rámmaeavttuid, ja váikkuhit dasa ahte sámi dáidaga promoteren lassána riikkaidgaskasaččat, cealká ráđđelahttu Vibeke Larsen.
Sámediggeráđđi ovddidii sámediggedieđáhusa dáidaga ja kultuvrra birra Sámedikki dievasčoahkkimii guovvamánu 27. b. dán jagi. Dieđáhusas čujuhuvvo ođđa geaidnu boahtteáiggi sámi dáidda- ja kulturpolitihkkii.
- Váldoulbmil lea luovvat dakkár ealli ja máŋggabealat sámi dáidda- ja kultureallima, mas lea buorre kvalitehta ja mii lea buohkaide olámuttus. Seammás mii háliidit loktet sámi dáidda- ja kulturealáhusaid, mii sáhttá váikkuhit dasa ahte eanet sámi dáiddárat sáhttet birget dainna maid sii ráhkadit, dadjá sámediggeráđđi Vibeke Larsen.
Ođđa doarjjaortnet lea oassin dán loktemis. Vuoruhemiin biddjojuvvo stuorát deaddu dakkár hutkkálaš doaimmaide, mat sáhttet leat mielde ovddideamen sámi ásahusaid ja lunddolaš arenaid.
- Ieš dat doaba hutkáivuohta sáhttá leat eahpečielggas ja dat mii lea hutkkálaš muhtun guovllus, ii dárbbaš leat seamma hutkkálaš eará guovllus. Dáinna vuoruhemiin mii geahččalit ovddidit hutkáivuođa ja oažžut ovdan ođđa doaibmafálaldagaid, čilge ráđđelahttu Larsen.
Sámediggi lea maid vuoruhan doarjut nuorra sámi dáiddáriid álggahanstipeanddaiguin.
- Lea oahpis ahte álgit dáiddárin ii leat álo nu álki. Danne mii leat oaidnán dárbun ahte ođđa ortnegii galgá maiddái gullat álggahanstipeanda nuorra sámi dáiddáriidda, cealká ráđđelahttu Larsen.
Ođđa ortnet doarju maiddái dakkár arenaid, fierpmádagaid ja ovttasbargoprošeavttaid mat váikkuhit dasa ahte sámi dáidda ja sámi dáiddárat promoterejuvvo eanet riikkaidgaskasaččat ja vuvdojuvvo riikkaidgaskasaš márkanii.
Ohcanáigemearri lea dán jagi cuoŋománu 1. b. Eanet dieđuid gávnnat min neahttasiiddus www.samediggi.no/Stipeanda-ja-doarjja
Oktavuohtaolbmot:
Ráđđelahttu Vibeke Larsen, tel. 941 30 116.