Sámediggi ásaha álggahanoahpahusa ja ovdánahttidoaimmaid sámi kulturealáhusaide ja eará fitnodagaide sámi guovlluin. Mii leat guhkesáiggi rámmaeavttuid dahkan skáhppojeddjiiguin mat galget veahkehit Sámedikki dáinna bargguin.– Mun lean ilus go mii dál ovttasbarggus eanet doaibmaválddálaš gávpelágádusaiguinmat sáhttet fállat fitnodatálggahanoahpahusa ja ovdánahttindoaimmaid sámi kultur- ja ealáhusaktevrraide, lohká sámediggeráđđi Silje Muotka.
Šiehtadusat ja ovttasbargu
Sámediggi lea dahkan šiehtadusa gávpelágádusaiguin Kreativ Industri, Bedriftskompetanse ja Consis praktihkalaš čađaheami birra dán áŋgiruššamis. Dása gullet álggahanoahpahus, ovdánahttindoaimmat, bagadallan ja fierpmádathuksen kultur- ja ealáhusaktevrraide sámi guovlluin. Osiid kulturáŋgiruššamis galgat čađahit ovttasbarggus sámi ásahusain dahje eará báikkálaš ovdánahttinaktevrrain.
Idealisma
Okta sámi kulturealáhusa dovdomearkkain lea ahte dat lea nanu idealisma nala huksejuvvon, dávjá váilu fidnolaš doaimmaheapmi ja dávjá lotnolasat eará ealáhusain. Ollu kulturaktevrrain ii leat gelbbolašvuohta doaimmahusa ealáhusbealis. Dása gullet jurdda- ja gávpeovdánahttin, ekonomalaš gelbbolašvuohta, buvttaovdánahttin ja márkanastinstrategiijat.
–Hástalussan šaddá nannet sámi kulturaktevrraid, vai sis lea iešdovdu ja máhttu olahit máilbmái iežaset buktagiiguin, lohká Silje Muotka.
Liige áŋgiruššan
Sámi kulturealáhusaid áŋgiruššan, álggahanoahpahus ja fitnodatovdánahttin bohtet leat lassin nannet áŋgiruššama mii Sámedikkis lea das mii dál juo gávdno sámi dáidaga, kultuvrra ja ealáhusaid ektui. Dát boahtá váikkuhit vel eanet dasa ahte nannet min váldomihttomeari olaheami, mii lea nana ja máŋggabealat ealáhusat mat leat vuođđun ealli báikegottiide gos olbmot háliidit orrut.
–Sámedikkis lea niehku ahte sámi buktagat ja erenoamážit kulturbuktagat ollejit viidábut go odne. Mii háliidit ahte erenoamážit sis guđet barget kulturealáhusain galget leat buoremus eavttut olahit viidábut márkaniin iežaset buktagiiguin, lohká sámediggeráđđi Silje Muotkaloahpas.
