Sámedikkis leat dál ođđa njuolggadusat stipeandajuolludeapmái ohppiide geain lea sámegiella fágan joatkkaskuvllas. Rievdadeapmi mielddisbuktá earret eará ahte juohke oahppi oažžu eanet ruđa stipeandan, lohká ráđđelahttu Silje Karine Muotka.
2013 juovlamánu dievasčoahkkimis lei stuora ovttaoaivilvuohta dasa ahte lasihit stipeandda oppalaš rámma 2,4 gitta 3 miljovdnii. Rievdadus mielddisbuktá ahte juohke oahppi gii ohcá, ja oažžu juolluduvvot stipeandda 2014:s, oažžu lasáhusa dan ektui mii juolluduvvui gaskamearalaččat ovddit jagi.
Eará rievdadus lea ahte šaddá eanet einnostahtti man stuoris stipeanda šaddá. Ođđa rehkenastinnjuolggadusat addet čielgasit gova das man ollu stipeandda guhtege oahppi sáhttá oažžut, ja dása lei Sámedikki dievasčoahkkimis stuora ovttaoaivilvuohta. Stipeandda sturrodat lea ná:
Ođđa ohcanáigemearri
Ođđa njuolggadusain lea maid ohcanáigemearri guhkiduvvon ođđajagimánu 15 beaivvi 2014 rájis gitta njukčamánu 30. beaivvi 2014 rádjái.
- Mii háliidit meannudit áššiid dađistaga go bohtet. Go guhkidit ohcanáigemeari, de oažžut mii dan vejolašvuođa. Mus lea maid jáhkku ahte dát rievdadusat váldojit bures vuostá ohppiin geat háliidit ohcat stipeandda Sámedikkis, čilge ráđđelahttu Muotka.
Oppalaš eavttut
Sii geat ožžot stipeandda, galget leat ollesáiggeoahppit almmolaččat dohkkehuvvon oahppobáikkis Norggas, dohkkehuvvon oažžut oahpahusdoarjaga Statens Lånekasse for utdanning:s.
Sii geat leat Norgga ássit, dahje lea riekti registreret iežaset Norgga ássin ja gullet almmolaččat dohkkehuvvon oahppobáikái Ruoŧas dahje Suomas, sáhttet ohcat stipeandda. Dát oahppit fertejit sáddet sisa lassidieđuid fágaoahpaheaddjis dan birra makkár dássi oahpahus veardida Sámedikki njuolggadusaid ektui; sámegiella vuosttašgiellan, nubbingiellan dahje vierisgiellan.
Stipeanda addo olbmuide geat lohket sámegiela vuosttašgiellan, nubbingiellan dahje vierisgiellan.