Sámediggi galgá konsulteret eksámenortnegiid birra ja lea danne hui gitta das ahte oažžu kommentáraid sámi ohppiin, vánhemiin, skuvlajođiheddjiin ja UH-suorggis. Nu šattašedje eksámenortnegat buoremusat heivehuvvot sámi oahpahussii.
Eksámenortnegiiguin lea dahkkojuvvon vuđolaš ja buorre bargu, ja Sámediggi lea buori muddui ovttaoaivilis gulaskuddandokumeanttaid evttohusaiguin. Sámediggi lea gulahallan Oahpahusdirektoráhtain barggus eksámenortnegiiguin.
Sámediggi lea oaidnán ahte muhtun evttohusat mat leat gulaskuddamis buorebut fertejit heivehuvvot sámegiel oahpahussii ja daidda geat čuvvot sámi oahppoplánaid.
Fágat dárogiella ja sámegiella berrejit šaddat ovttadássásažžan ja oažžut seamma vuoigatvuođaid eksámenis. 3. oasis – čuo. 4 – Forslag til eksamensordninger i fag, lea Dárogielfágas 10. ceahkis evttohuvvon ahte oahppit sáhttis vuorbbis oažžut guokte beaivvi čálalaš eksámena, dárogielas váldogiellan ja dárogielas oalgegiellan. Eksámenis galgá leat ráhkkananoassi. Fágas Sámegiella vuosttašgiellan lea maid čálalaš eksámen, muhto ii leat evttohuvvon ahte sámegiel eksámenis galgá leat ráhkkananoassi. Ráhkkananoassi ii leat evttohuvvon Jo2 fidnofágalaš oahppoprográmma sámegielfágas ge, muhto lea evttohuvvon dárogielfágas. Galggašii leat lunddolaš bidjat ráhkkananoasi eksámenii sámegielfágas, nugo dárogielas ge.
Sámediggái lea maid deaŧalaš árvvoštallamis oppalaččat vuhtii váldit ohppiid ja oahpahalliid sámegielalaš ja -kultuvrralaš duogáža.
Gulaskuddama 1. oasis, čuo. 4 Grunnlag for vurdering i fag, evttohuvvo bidjat láhkaásahussii ahte gealbomihttomeriid galgá áddet Fága birra teavstta vuođul. Fága birra guoská oahppoplánii ollásit, ja nu maid vuordámušaide sámi sisdollui. Sámediggi oaivvilda ahte sihkkarastin dihte sámi sisdoalu oahppoplána gealbomihttomeriin, earenoamážit fágain main ii leat sierra sámi sisdoallu gealbomihttomeriin, lea dát deaŧalaš evttohus. Dákkár evttohusaid galggašii gulaskuddamis kommenteret.
Dasto oaivvilda Sámediggi ahte eksámenortnet ferte sihkkarastit ahte sámi oahppit, oahpahallit ja praksiskandidáhtat ožžot vejolašvuođa eksámena váldit sámegillii. Dat guoská fágaide sámi parallealla ovttaárvosaš plánain ja nationála oahppoplánain, ja fidnofágalaš oahpposurggiin ja studerenráhkkanahtti fágain.