Sámediggi nammada bargojoavkku mii galgá ráhkadit etihkalaš njuolggadusaid sámi humána biologalaš ávdnasiid geavaheami ja hálddašeami várás. Bargojoavku galgá maiddái árvvoštallat lea go vejolaš listet daid sámi humána biologalaš ávdnasiid mat leat vurkejuvvon iešguđet sadjiide.
-Bioteknologalaš ovdáneapmi buktá ollu ođđa hástalusaid sámi servodahkii. Ovdáneapmi rahpá vejolašvuođaid sihke buhcciid dikšumis, máhttoovddideamis ja dutkamis. Áŋgiruššamis leat deaŧalaš váikkuhusat boahttevaš dearvvašvuođabálvalussii, muhto mearrideaddjin lea ahte dat čađahuvvo juridihkalaččat ja etihkalaččat dohkálaš vugiin, dadjá sámediggeráđđi Henrik Olsen.
-Mii galgat ieža hálddašit ja oamastit máhtu iežamet genaid (DNA) birra, ja ahte sámi álbmot galgá oktilaččat gulahallat stáhta eiseválddiiguin ja dutkanbirrasiiguin nu ahte sáhttit čuovvolit ja váikkuhit dán ovdáneami, dadjá Olsen.
Bargojoavkkus galget leat sámi dearvvašvuođafágalaš dutkanbirrasa ja juridihkalaš áššedovdiid ovddasteaddjit. Bargojoavku galgá geiget barggus maŋimusat jagi geahčen Sámediggeráđđái.
Mandáhta:
Bargojoavkku mandáhta lea:
Árvvoštallat lea go vejolaš ráhkadit listta mii čájeha daid humána biologalaš ávdnasiid, mat dál leat vurkejuvvon. Dat galgá viidáseappot identifiseret ja problematiseret iešguđet hástalusaid dáid ávdnasiid vurkema ja oamasteami oktavuođas. Visogovas galget maid leat árvvoštallojuvvon guđe etihkalaš čuolbmačilgehusat galget leat mielde njuolggadusain.
Joavku galgá maid árvvoštallat makkár juridihkalaš stáhtus dakkár njuolggadusain berre leat. Ságaškuššojuvvot galgá maiddái viidáset meannudeapmi ráđđehusas, eará sámedikkiin ja riikkaidgaskasaš álgoálbmotforain.
Gulahalli: Sámediggeráđđi Henrik Olsen, 907 75 219