Sámedikki etihkalaš njuolggadusaid ráhkadeami oktavuođas sápmelaččaid dearvvašvuođa dutkamii Norggas áigu sámediggeráđđi Henrik Olsen, ovttas Sámi dearvvašvuođaguovddážiin ja SÁNÁG:in, galledit Austrália gos leat ráhkaduvvon njuolggadusat álgoálbmogiid dutkamii.
-Bioteknologalaš ovdáneapmi hástala sámi álbmoga. Mii galgat ieža hálddašit ja eaiggáduššat máhtu iežamet genaid birra, ja danne mis ferte leat gulahallan stáhta eiseválddiiguin ja dutkanbirrasiiguin čuovvolan ja váikkuhan dihtii fágasuorggi ovdáneami, dadjá sámediggeráđđi Henrik Olsen.
Austrálias leat ráhkaduvvon sierra etihkalaš njuolggadusat álgoálbmogiid dutkamii. Njuolggadusat ođasmahttojuvvojit jeavddalaččat čuovvolan dihtii bioteknologiijasuorggi ovdáneami. Njuolggadusat fátmmastit árbedieđu ja árbevirolaš kulturovdanbuktima, álgoálbmogiid ja dutkiid gaskasaš šiehtadusaid ja protokollaid ja dieđuid digitaliserema ja lagadeami.
-Sámediggái lea deaŧalaš oaidnit mo proseassat čađahuvvojit ja mo njuolggadusat ođasmahttojuvvojit, dadjá Olsen.
Melbourne universitehta álgoálbmotoahpuid ossodat lágida min galledeami. Vuolgga lea guovvamánu 20. b.
-Galledeami oktavuođas oažžu Sámediggi maid dieđuid dakkár iešguđet dearvvašvuođahástalusaid ja dutkama birra mat gusket álgoálbmogiidda. Earret eará stuorát dutkanprošeakta das makkár dieđut leat mánáid ja nuoraid dearvvašvuođa ja eallindiliid birra, mat leat miellagiddevaččat midjiide go mis váilot dieđut sámi mánáid dearvvašvuođa ja eallindiliid birra, dadjá Olsen.
Viidáseappot lea vuođđodearvvašvuođafálaldat láhččojuvvon álgoálbmogiidda. Sámediggi háliida oažžut jurdagiid ja ovdamearkkaid das mo vuođđodearvvašvuođafálaldaga sáhttá lágidit, dannego buohccit dávjá vásihit ahte vuođđodearvvašvuođas leat láhččojuvvon uhccán fálaldagat, loahpaha Olsen.
Eanet dieđuid addá: Sámediggeráđđi Henrik Olsen, 907 75 219