Lávdegotti, maid Sámediggi lea nammadan jođihii prof. Siv Kvernmo, Uit. Lávdegottis leat leamaš sámi dearvvašvuođafágalaš dutkanbirrasat ja juridihkalaš áššedovdit.
Bargojoavkku mandáhta lea ráhkadit evttohusa njuolggadusaide sámi dearvvašvuođadutkama várás. Evttohus galgá válddahit sámi dearvvašvuođadutkama oppalaččat ja dutkanprošeavttaid mas mielde biologalaš ávdnasat.
Lávdegoddi galgá árvvoštallat leago vejolaš ráhkadit geahčastaga das makkár sámi humána biologalaš ávdnasat leat juo ráddjojuvvon. Dasto identifiserejuvvojit ja problematiserejuvvot sierra hástalusat dáid ávdnasiid rádjama ja ráđđenvuoigatvuođa birra. Geahčastagas fertejit leat guorahallamat das makkár etihkalaš áššečuolmmat fertejit leat mielde njuolggadusain.
Joavku ferte maiddái guorahallat makkár juridihkalaš stáhtus dán lagan njuolggadusaid berre leat. Ferte maiddai namuhuvvot viidáset meannudeapmi ráđđehusas, eará sámedikkiin ja riikkaidgaskasaš álgoálbmotforumis.
Sámedikki presideanta Aili Keskitalo dadjá ahte ulbmil etihkalaš njuolggadusain sámi dearvvašvuođadutkama ja olmmošlaš biologalaš ávdnasiid várás, lea bagadit ovttaskas dutkiid, dutkanásahusaid, sámi servodagaid ja ovttaskas olbmuid makkár dutkanetihkalaš prinsihpat berrejit leat vuođđun sámi dearvvašvuođadutkama várás.
– Deaŧalaš lea ahte sámi dárbbut ja vuoigatvuođat gozihuvvojit dearvvašvuođadutkamis, sihke go guoská min olmmošlaš ávdnasiid eaiggátvuhtii ja movt dát dutkan čađahuvvo, dadjá Keskitalo.
Eanet dieđuid addiba: Sámedikki presideanta Aili Keskitalo, 971 29 305. Lávdegotti jođiheaddji prof. Siv Kvernmo, 922 34 511. Kvernmo searvá almmuheapmái ja vástida gažaldagaide evttohusa njuolggadusaid birra.
Almmuheapmi lea sámediggeviesus vuossárgga juovlamánu 04. b. dii. 14.00 čoahkkinlanjas 214