- Dat go Finnmárkkukommišuvdna odne buktá vuosttaš raportta mas leat konklušuvnnat geavahan- ja eaiggátvuođavuoigatvuođaid birra, lea fas okta deaŧalaš lávki Finnmárkku eana- ja resursavuoigatvuođaid dohkkeheamis , dadjá Sámedikki presideanta Egil Olli.
Finnmárkkukommišuvdna čielggada Finnmárkkulága mielde geavahan- ja eaiggátvuoigatvuođaid buot eatnamiin maid Finnmárkkuopmodat stivre ja hálddaša. Finnmárkkukommišuvdna mearrida ieš makkár guovlluid čielggada ja guđe vuoru mielde. Odne ilbmá vuosttaš raporta Stierdná/Sievjju guovllu birra konklušuvnnaiguin.
- Geavahan- ja eaiggátvuoigatvuođaid kárten ja nannen lea ođđa vásihus midjiide Finnmárkkus. Danne lea munnje deaŧalaš ahte guoskevaš bealit ja earát dál geavahit dárbbašlaš áiggi geahčadit kommišuvnna árvvoštallamiid ja konklušuvnnaid, ja ahte mii áiggis ovddas guvlui čájehit áddejumi dasa ahte raportta čuovvoleapmi sáhttá leat hui lossat ollu beliide, cealká Olli.
Finnmárkkukommišuvnna raporta ja konklušuvnnat leat okta oassi riekteproseassas, maid guoskevaš bealit juogo dohkkehit dahje hilgot. Jos bealit eai nagot soahpat, de sáhttá Finnmárkkukommišuvdna soabahallat guoskevaš beliid gaskka, ja ášši sáhttá biddjojuvvot meahcceduopmostuolu ovdii beannot jagi maŋŋá raportta almmuheami rájes.
- Danne go kommišuvnna raporta lea oassi riekteproseassas, ii leat riekta politihkalaš dásis buktit mearkkašumiid konklušuvnnaide. Kommišuvnna viidáseappot barggu geažil lea deaŧalaš muittuhit ahte dan bargu dahkkojuvvo lága vuođul masa lei viiddis politihkalaš doarjja Stuorradikkis ja Finnmárkku fylkkadikkis, ja ovttajienalaš Sámedikkis, dadjá Sámedikki presideanta Egil Olli loahpas.
Oktavuođaolmmoš:
Presideanta Egil Olli, tlf. 900 26 880