- Ovcci jagi maŋŋá go Stuorradiggi dohkkehii finnmárkkulága Sámedikki ovttajienalaš mieđihemiin, lea biddjojuvvon ovdan vásáhusvuođđu ollislaš guorahallamii nu ahte sáhttá čađahit čuovvoleami lága vuođul. Danne ovddida sámediggeráđđi dál Sámedikki dievasčoahkkimii ášši finnmárkkulága čuovvoleapmái. Ášši meannudeamis sáhttá Sámediggi doarjut nammaduvvon lahtuid dan sin deaŧalaš barggus, dadjá ráđđelahttu Silje Karine Muotka.
Sámediggieráđđi ovddida mearrádusevttohusa dáid fáttáid birra; 1) Finnmárkkuopmodaga mearrádus rievdaduvvon meahccegeavaheami birra ja badjebáhcaga geavaheami birra, 2) gili olbmuid, fylkka ássiid ja earáid gaskavuohta ođasmuvvi resurssaid hálddašeami oktavuođas, 3) báikkálaš olbmuid guolástanvuoigatvuođat Deanus ja Njávdámis, 4) opmodat- ja geavahanvuoigatvuođaid kárten ja dohkkeheapmi ja 5) eana- ja resursavuoigatvuođat olggobealde Finnmárkku.
- Lean mihtten olbmuid áŋgiruššama ja digaštallamiid dakkár áššiin go areálasisabahkkemat, šiehtadusat báikkálaš guolástushálddašeami várás ja turisttaid bivdima ja oagguma muddemat. Dát leat deaŧalaš digaštallamat finnmárkkulága vuođul masa ráđđi áigu láhčit dili nu ahte maiddái dat digaštallojuvvo ja meannuduvvo govda ja áššálaš vuođuin Sámedikkis, dadjá Muotka.
- Sámediggeráđđi oaivvilda deaŧalažžan dan čujuhit ahte Stuorradiggi lea bidjan vuođđun ahte finnmárkkulága váldomihttomearri lea sihkkarastit sámi kultuvrra luondduvuđđosa. Danne ferte dán mihttomeari fuolahit aktiivvalaččat go lága eaŋkilmearrádusat čuovvoluvvojit, dadjá Muotka.
- Min mearrádusevttohusas mii čujuhit earret eará dasa ahte Finnmárkkuopmodaga stivra ferte dahkat mearrádusaid ja daid almmuhit áššiin mat gusket rievdaduvvon meahccegeavaheapmái ja main Sámedikki árvvoštallamat leat mielde. Deattuhuvvo maiddái ahte luondduresurssaid hálddašeapmi ferte dahkkojuvvot dainna lágiin ahte báikkálaš olbmuid iehčanas bivdin-, meahcástan- ja guolástanvuoigatvuohta ja eará vuoigatvuođat jotkojuvvojit eai ge gáržžiduvvo earáid geavaheami geažil, dadjá ráđđelahttu Muotka.
Sámediggeáirasat čoahkkanit lávdegoddebargui miessemánu 19.-22. b. ja dievasčoahkkimii geassemánu 2.-6. b.