Ráđđelahttu Ellinor Marita Jåma lea fuolastuvvan fálaldagaid geažil psykalaš dearvvašvuođasuodjalusas lullisámi guovllu buhcciide ja bivdá Davvi Dearvvašvuođa váldit vuhtii ahte sis lea nationála ovddasvástádus buot sámiin Norggas, maiddái lullisámi guovllus.
- SÁNAG lea huksen áidnalunddot giella- ja kulturgelbbolašvuođa sámi áššiin, mii maiddái berre boahtit lullisápmelaččaide buorrin, čujuha ráđđelahttu Jåma viidáseappot.
Álgoálbmotgeatnegasvuođaid vuođul lea buot sápmelaččain Norggas vuoigatvuohta oažžut heivehuvvon dearvvašvuođafálaldaga mas lea giella- ja kulturgelbbolašvuohta. Dán vuođul dat ásahuvvui ge SÁNAG.
- Sámediggeráđđi ii dohkket goassege kvalitehta dáfus heajut fálaldaga SÁNAG:s lullisámi buhcciide. Áiggun dán ášši váldit ovdan Ráđđehusain konsultašuvnnaid bokte, ja bivddán Davvi Dearvvašvuođa váikkuhit dakkár čovdosii, mas maiddái lullisámi buohccit ožžot diksofálaldaga SÁNAG:s, cealká Ellinor Marita Jåma.
Ráđđelahttu Ellinor Marita Jåma čujuha loahpas dasa ahte Davvi Dearvvašvuohta berre leat doarjjan SÁNAG:ii dán barggus, ja oaidnit man mávssolaš dikšofálaldat lea maiddái lullisámi buhcciide.
Gulahalli:
Ráđđelahttu Ellinor Marita Jåma, tel. 916 13 460