Gáhttejit riddo- ja vuotnaálbmoga historjjálaš vuoigatvuođaid

Sámediggi ja ráđđehus leat konsultašuvdnaproseassain Riddoguolástuslávdegotti čuovvoleamis gávnnahan ahte lea sierramielalašvuohta dulkomis riektevuođu das lea go riddo- ja vuotnaálbmogis guolástanvuoigatvuohta sámi guovlluin. Sámediggi áigu  čuovvolit dán sierramielalašvuođa go stuorradikki ealáhuslávdegoddi meannuda dán ášši.

Sámedikki dievasčoahkkimis cuoŋománu 16.-19. b. oinnii sámediggepresideanta sávahahttin oažžut Sámedikki politihkalaš joavkkuid ovttasbargat Stuorradikki ektui go dat meannuda láhkaevttohusaid. Buot Sámedikki joavkkut, earret Ovddádusbellodaga, sohpe lassecealkámuša.

-    Eahpitkeahttá lea Sámediggái givrodahkan leat dadjat juo ovttamielalažžan dulkot ášši dan láhkai ahte leat historjjálaš guolástanvuoigatvuođat ja ahte dat álo leat leamaš. Dakkár celkojuvvon ovttamielalašvuohta Sámedikki bealis lea deaŧalaš dasa ahte oažžut Stuorradikki áddet man deaŧalaš dat lea ahte historjjálaš guolástanvuoigatvuohta dohkkehuvvo, loahpaha presideanta Egil Olli.

Guolástus- ja riddodepartemeantta láhkaevttohus (Prop. 70 L) oassálastinlága, mearraresursalága ja finnmárkolága láhkarievdadusa birra guolásteami várás Finnmárkkus ja mearrasámi guovlluin Romssas ja Nordlánddas geigejuvvui njukčamánu 16. b. Ealáhuslávdegottis lea sierra čoahkkin Sámedikkiin, ja rabas čoahkkin ášši birra miessemánu 7. b. Ealáhuslávdegoddi lea dieđihan evttohusa áššái miessemánu 29. b.

Gulahalli:

Presideanta Egil Olli, tlf. 900 26 880